Temas: XUSTIZA FOLGA

Persoal de xustiza protesta nas cidades días antes de reunirse coa Xunta

Unha manifestación con decenas de vehículos polo centro de Vigo provoca retencións. Tamén houbo actos reivindicativos en Santiago e Coruña.

Por E.P. | VIGO | 16/03/2018 | Actualizada ás 15:21

Comparte esta noticia

Os traballadores da xustiza protagonizaron este venres diversos actos reivindicativos nas cidades galegas para dar visibilidade á súa protesta tres días antes da reunión que terá lugar o vindeiro luns, día 19 de marzo, entre o comité de folga e a Xunta para tentar pór fin á folga indefinida no sector. Un mes e nove días despois de que o pasado 7 de febreiro os traballadores iniciasen este paro indefinido, Xunta e sindicatos volveron a discrepar nas cifras do seguimento da folga. Así, mentres que o Goberno galego asegurou que un total de 995 persoas secundaron o paro este venres, situando o seguimento nun 36,30%; os sindicatos volveron a elevar esta cifra en torno ao 81,7%.

Manifestación en coches dos traballadores de Xustiza
Manifestación en coches dos traballadores de Xustiza | Fonte: Europa Press

En canto ás protestas, a principal tivo lugar en Vigo, onde persoal da xustiza en varias decenas de vehículos, uns 40 segundo os organizadores, participaron na mañá deste venres nunha marcha polo centro da cidade ocasionando grandes retencións con obxectivo de visibilizar a súa protesta e volver reivindicar "a igualdade salarial" cos traballadores do resto do Estado. Os traballadores fixeron esta manifestación en automóbiles, nos que colocaron bandeiras, globos de cores e numerosos carteis con lemas como: 'Xustiza en loita', 'Contra a prepotencia, resistencia' e 'Xustiza galega en pé'.

A marcha arrincou pouco despois das 11,00 horas nos xulgados de Vigo, e transcorreu por Gran Vía, Urzáiz e Beiramar, até o seu regreso, ao redor dunha hora e media despois. De camiño, realizaron breves paradas, unha das máis relevantes ante a sede da Xunta, onde se subiron nos vehículos e cantaron diversas consignas.

O portavoz do comité de folga en Vigo, Julio Bouza, de SPJ-USO, indicou que o conflito empezou xa en novembro, cando os traballadores solicitaron abrir unha mesa de negociación, aínda que o vicepresidente da Xunta e conselleiro de Xustiza, Alfonso Rueda, fixo "caso omiso" e "menosprezou aos traballadores de Xustiza". Bouza destacou que o colectivo de traballadores da Xustiza "deu un exemplo nunca visto en Galicia" con esta mobilización, que "é un investimento a longo prazo". Neste sentido, subliñou que son un colectivo "unido, solidario e comprometido co servizo público; cousa que non fai Rueda".

"Non sabe xestionar", remarcou, antes de culpar ao conselleiro de xerar "un caos absoluto por prepotencia e pouco afán negociador". De feito, criticou que na última reunión Rueda comprometeuse a volver convocarlles este luns pero finalmente fíxoo para unha semana despois. Pola súa banda, este mesmo venres, o vicepresidente da Xunta, Alfonso Rueda, apelou aos sindicatos a "negociar con responsabilidade" para poder "chegar a un acordo" na nova reunión que ambas as partes manterán o vindeiro luns.

PROTESTA EN A CORUÑA

Pola súa banda, na Coruña, os funcionarios trasladaron as súas reivindicacións ás portas dun céntrico edifico con motivo da presenza do Director Xeral de Xustiza, Juán José Martín, que acudía á inauguración dunhas xornadas de Dereito de Familia.

Despois da concentración do xoves ante a antiga sede da Audiencia Provincial, medio centenar de funcionarios trasladáronse ás portas da Fundación Barrié, que este venres acollía a inauguración das III Xornadas de Dereito de Familia, e á que nun primeiro momento estaba previsto que acudise o conselleiro de Xustiza, Alfonso Rueda. Unha presenza coa que previsiblemente contaban os funcionarios, quen, sen chegar a proferir ningún cántico á entrada do director Xeral, mostraron carteis cunha lema principal: '38 días de folga. 3 convocatoria para negociar. Rueda deixa de mentir, así é imposible pechar o conflito'.

Os funcionarios, vestidos con camisetas azuis coas palabras de 'Xustiza en Folga', permaneceron fóra, na porta de entrada do edificio, a cuxo interior accedeu sen ningún tipo de problemas o director Xeral de Xustiza. Para visibilizar as súas queixas, a través do cristal da porta principal, que permaneceu pechada en todo momento, os sindicalistas mostraron os seus carteis nos que reclamaban pór fin a este conflito laboral.

ACTOS EN SANTIAGO

En Santiago de Compostela, o persoal de xustiza, ataviado con camisetas reivindicativas e unha pancarta na que se puido ler 'Non a discriminación laboral na xustiza Galega', organizou un almorzo solidario nas dependencias dos xulgados, ás que os traballadores levaron diversos alimentos que despois doaron á cociña económica.

En concreto, segundo Antón Ayaso (CIG), os traballadores quixeron levar á Cociña Económica aqueles produtos que máis necesitan, como "aceite, zumes ou café", despois de que así llo trasladase o persoal desta entidade. Ademais, tamén se rexistrou outra protesta en Pontevedra, onde traballadores realizaron unha "sentada reivindicativa" no edificio da Parda.

Temas: XUSTIZA FOLGA
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 4 comentarios

1 Fuilco

Seguen fod... á xente, e logo choran porque todo o mundo ponse en contra deles. Conseguirán outra maioria absolutísima para o Feijoo.

1 Minhamamainhadoceo

É curiosísimo este razoamento. Quen fastidia á xente son os funcionarios xudiciais (Feijóo non). E quen fai que o partido máis corrupto de Europa teña maioría absoluta tamén son os traballadores da Xustiza (os mansos coma ti non).

2 Fuilco

Si el PP es un partido corrupto es gracias a los funcionarios de Justicia que no cumplen con su trabajo. Sólo por eso ya habría que echar a muchos jueces y funcionarios judiciales. O no?

3 sermos mantidos

Correcto Fuilco, concordo 100%. Na xudicatura e na prensa está o sostén da mafia do Partido Podre e do PsoEspañol. E non había que botalos: hai que poñelos dentro da cadea!