Por Galicia Confidencial | Compostela | 04/04/2018 | Actualizada ás 11:21
Plásticos, peumáticos ou mobles vellos. Todo acaba sendo queimado nun vertedoiro municipal do Concello de Maside que se atopa a a escasos 40 metros dun complexo recreativo. Así o denuncia Plataforma Masiá que critica que sexan operarios do concello os que queiman e acumulan restrollos e outros compoñentes tóxicos.
Esta entidade lamenta a "permisidade" das institucións ante este tipo de condutas que, di, "degradan a calidade do chan e o medio ambiente da zona". Lembran, ademais, que xa presentara denuncia ante o Servizo de Calidade e Avaliación Ambiental e a Fiscalía de Medio Ambiente de Ourense polo soterramento de residuos da construción nunha leira privada, do que o Concello de Maside tiña constancia. "Ambas as denuncias foron arquivadas a pesar de existir dúas probas periciais do Servizo de Criminalística do Seprona que acreditaba o soterramento destes materiais", engade.
Por iso, Plataforma Masidá non descarta volver denunciar este tipo de actucións e omisións ante as autoridades competentes, e en caso de recibir a mesma resposta, solicitar o amparo do Defensor do Pobo. Considera que este tipo de condutas, á marxe de ser constitutivas de ilícitos penais ou administrativos, non son de recibo nunha sociedade do século XXI, e "son contrarias á máis mínima sensibilidade ambiental".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.