Por E.P. | SANTIAGO DE COMPOSTELA | 22/04/2018 | Actualizada ás 11:20
O colectivo animalista Libera instou á Xunta a seguir o exemplo do Cantón suízo de Xenebra, onde desde a década de 1970 está prohibida a caza e "o 45 por cento do seu territorio está sometido ao aproveitamento agrícola".
Libera e a Fundación Franz Weber, entidade fundada en Suíza un ano despois de que Xenebra aprobase a normativa de veto á caza, volven criticar que o Goberno galego propoña esta práctica como método para o control poboacional de certas especies como o xabaril.
Así, lembran que Xenebra aprobou o veto á caza logo dunha iniciativa cidadá que impulsou un referendo sobre esta práctica. Finalmente, as batidas foron prohibidas, norma que aínda permanece en vixencia após máis de 40 anos.
Deste xeito, Libera e FFW instan á Xunta a seguir os pasos do cantón helvético, onde se destinan "unha cantidade media de 200.000 euros para indemnizacións relacionadas con perda de cultivos ou gando".
Ademais, apuntan que a prohibición non supuxo máis "ataques" nin "desfeitas" nas plantacións por parte de raposos ou xabaríns, e mesmo fomentou unha maior e máis variada biodiversidade.
Nesta liña, alertan que, no caso de que o Goberno galego siga adiante coa súa intención de autorizar maior número de batidas, a contaminación que deixan no medio natural os perdigóns de chumbo "non deixaría de aumentar", como tamén o faría "o abandono de cans", unha realidade, segundo Libera, "que todas as protectoras de Galicia constatan con porcentaxes alarmantes".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.