Por E.P. | SANTIAGO DE COMPOSTELA | 08/05/2018 | Actualizada ás 14:09
O Parlamento galego deu luz verde este martes por unanimidade por terceira vez a comezar o proceso para reclamar a transferencia da autoestrada AP-9 para Galicia, vetada en varias ocasións polo Goberno central. No debate da toma en consideración da proposición de lei defendida polo BNG, a portavoz nacionalista, Ana Pontón, deixou claro que "hoxe ten que iniciarse un terceiro intento que ten que ser o definitivo".
"Que cambiou para volver traer esta solicitude?". A esta pregunta responde Pontón cun recente fallo do Tribunal Constitucional que fixa que "o Goberno non ten poder absoluto para vetar as leis por razóns orzamentarias" e que o Executivo central "non ten un dereito de veto ilimitado". "Unha sentenza do TC está a dicir que o PP utilizou mentiras para vetar a transferencia da AP-9", sentenza.
Sobre as posibilidades que abre este recente fallo do Constitucional coincidiron o resto de grupos. Xoaquín Fernández Leiceaga (PSdeG) remarca que "se abre unha vía para rectificar esa posición" do Goberno, porque a sentenza do TC "dá no cravo" e "di que é improcedente" a actuación do Executivo central co seu veto. Nesta liña, Marcos Cal (En Marea) lamenta o "falso patriotismo" do PP, posto que alude a ese fallo do TC para reprochar que "o PP é constitucional a tempo parcial".
Pola súa banda, Martín Fernández Prado (PP) mostrou o apoio do seu grupo a volver pedir a transferencia, pero apunta que a Mesa do Congreso anunciou após esta sentenza do TC a revisión de oficio daquelas cuestións vetadas, polo que "é posible que esta revisión de oficio chegue antes desta nova lei", que tramitará agora a Cámara galega.
"EMPRESA PIRATA"
Durante o debate, Pontón chamou a pór fin a unha situación na AP-9 na que a concesionaria "se comporta como unha empresa pirata" con peaxes "desorbitadas", mentres se seguen sucedendo os colapsos como os da pasada fin de semana en Rande, con Audasa "recortando traballadores" e "dando peor servizo".
Ademais, identifica o veto ao traspaso con "un fracaso persoal de Feijóo, que é incapaz de que se transfira a AP-9". Por iso, considera que esta futura lei é unha "ferramenta para conseguir unha AP-9 pública, galega e libre de peaxes".
Ademais, Marcos Cal (En Marea) censurou que "até en catro ocasiones o PP en Madrid impediu o debate" dunha iniciativa con apoio "unánime en Galicia" presentada por En Marea. Tamén cuestionou Cal os cálculos que fai o Goberno sobre o custo da transferencia, que pasa de 4.300 millóns "a agora máis de 8.000 millóns". Todo iso, mentres a Xunta "volve permanecer sumisa" ante "a burla e estafa aos galegos" de Audasa.
CAMBIOS NO TRÁMITE PARLAMENTARIO
O popular Martín Fernández Prado coincidiu en que a transferencia "é posible" e "o mellor para os intereses dos galegos", así como "xuridicamente viable". Con todo, Fernández Prado mostrou o seu "desgusto" por que o Bloque "volva presentar" a proposta inicial, coa que se "volve catro anos atrás", no canto do texto que saíu en 2017 do Parlamento galego que "facilita a tramitación".
E é que no segundo texto de 2017 retirábase o prazo incluído na primeira proposta dun máximo de seis meses para o traspaso efectivo da citada autoestrada e púñase por escrito --nunha disposición adicional-- que o cambio de titularidade non suporá ningún incremento dos créditos nin diminución dos ingresos previstos nos orzamentos estatais en vigor. Con todo, o PP reprocha ao BNG que retrocede ao texto orixinal sen incluír esas melloras.
Nesta liña, Leiceaga tamén cre necesarias melloras durante o trámite parlamentario desta lei. Con todo, lamenta que haxa que iniciar de novo este proceso que "é longo e complicado" por un veto que "non estaba fundamentado" pola Mesa do Congreso "con maioría do PP e Cs".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.