Feijóo carga contra Ciudadanos: “O seu único obxectivo é captar militantes do PP”
O presidente da Xunta confía en que o seu ex conselleiro Javier Guerra non acabe en C's porque, lembra, “leva 36 anos no PP”. “Non se entendería que marchara a unha copia do Partido Popular”, suliña.
Por Xurxo Salgado | Compostela | 18/05/2018 | Actualizada ás 15:00
A posibilidade de que un dos ex conselleiros de Alberto Núñez Feijóo, Javier Guerra, ex titular de Industria, acabe en Ciudadanos provocou indignación e tensión dentro das filas do Partido Popular. Primeiro foron a líder do PP vigués, Elena Muñoz, e logo o vicepresidente da Xunta, Alfonso Guerra, os que apuntaron que considerarían unha “deslealdade” que quen foi un dos dirixentes do seu partido acabe na formación de Albert Rivera. E este venres foi o propio presidente galego o que atacou duramente a este partido: “O seu único obxectivo é captar militantes do PP”, dixo.
Na rolda de prensa posterior ao Consello da Xunta, Feijóo foi moi crítico coa formación de Rivera á que acusou de tentar convencer a dirixentes populares para as vindeiras citas electorais. “A min gústanme máis os orixinais que as copias”, ironizou.
E todo, o presidente galego descartou a posibilidade de que Guerra acabe en Ciudadanos. “A sensación que teño é que me sorprendería moito que abandone o PP para ir a Ciudadanos”, dixo. E para iso deu dúas razóns. A primeira ten que ver co tempo que leva no PP, 36 anos, “máis ca min”, dixo. “E xa foi parlamentario, deputado no Congreso, vicepresidente do PP de Vigo e conselleiro... Con esa traxectoria non creo que acabe en Cs”, indicou.
RAZÓNS PARA QUE GUERRA NON ABANDONE O PP
“A primeira razón é por coherencia política e biográfica”, dixo. E a segunda foi xa máis persoa. “Téñolle afecto e non se entendería no partido que marchara a Ciudadanos”, engadiu. Con todo, o líder do PP galego tamén recoñeceu que non falou con Guerra sobre esta cuestión e insistiu en que non cre que marche do Partido Popular. “Imaxinense que José Manuel Rey –presente tamén con el na rolda de prensa-- deixe o goberno para presentarse por Ciudadanos”, díxolle ás xornalistas.
En todo caso, tamén mandou un serio aviso a quen foi o seu ex conselleiro; “xa sabe como acaban todos os candidatos de Ciudanos á Xunta”, dixo con medio sorriso en alusión a última candidata que se presentou nas pasadas eleccións e non obtivo escano. “Eu a un amigo non lle desexo iso”, apuntou.
Cs DI QUE FOI GUERRA QUE FALOU CON ELES
Por outra banda, a portavoz de Ciudadanos en Galicia, Olga Louzao, asegurou que os contactos con Javier Guerra para a súa incorporación ao proxecto laranxa partiron do propio exconselleiro por unha cuestión de índole "persoal" coa dirección nacional do partido que acabou derivando en "conversacións políticas".
