Santalices responde sobre a súa actuación co fallo da Gürtel e a oposición rexeita "mordazas"

O presidente do Parlamento, Miguel Santalices, trasladou á mesa e á xunta de portavoces unha "nota aclaratoria" dos servizos xurídicos en relación coa información que el mesmo solicitou ao letrado oficial maior da Cámara a pasada semana, segundo asegura, con anterioridade ao pleno após o fallo da Gürtel.

En resposta a esta "nota aclaratoria", que está datada este luns 11 de xuño, os portavoces da oposición advertiron de que os seus grupos non van aceptar "ningunha mordaza" no hemiciclo, mentres que o PP considerou "normal" que Santalices "se apoie" nos servizos xurídicos e defendeu a súa actuación "en liñas xerais".

En concreto, a nota, que foi entregada aos grupos e tamén aos medios de comunicación, conclúe que "as expresións consultadas pola presidencia, tales como 'o Partido Popular é un partido corrupto', 'o Partido Popular foi condenado por corrupción' e parecidas, poderían dar lugar a chamadas á orde (*) na medida en que infrinxan os deberes de cortesía e respecto da orde parlamentaria (...)". Nunha primeira conclusión establece que "parece evidente a liberdade de crítica política dos feitos descritos na sentenza", aínda que "pode dar lugar á intervención presidencial cando se fan imputacións delituosas a suxeitos que non son condenados por delitos".

Ademais, a través dunha nota de prensa, o Parlamento explica que o informe xurídico, no seu momento, "non se trasladou aos grupos parlamentarios porque facelo podería ser interpretado como un intento de limitar a liberdade de expresión" dos deputados.Cando foi mencionado por Santalices no pasado pleno, o tres grupos da oposición reclamaron a convocatoria dunha xunta de portavoces con carácter urxente para abordar este asunto. O comunicado do Parlamento difundido este martes engade que "o habitual é que o contido" de "consultas" deste tipo "non alcance transcendencia pública", argumento que foi utilizado tamén polo portavoz parlamentario dos populares galegos, Pedro Puy, ao ser preguntado respecto diso.

"PAGA CON MORDAZA A CAMPAÑA DE FEIJÓO"

"O Parlamento de Galicia paga con mordaza a campaña de Feijóo en Madrid", aseverou o portavoz de En Marea no Pazo do Hórreo, Luís Villares, na súa comparecencia ante os xornalistas após a xunta de portavoces deste martes.Villares censurou a actuación de Santalices, contra a que, segundo indicou, o seu grupo remitiu un escrito "de queixa" por como dirixe os plenos. "Non se pode falar mal dos amigos de Santalices", recriminou.

Nesta liña, reprochou que hai expresións, como que "o PP é un partido condenado por corrupción", que "se poden dicir no Parlamento español e non no galego", algo que lle serviu para concluír que "a maioría absoluta", en Galicia, "utilízase para amordazar". "En Marea pediu o informe do 4 de xuño e recibimos unha nota aclaratoria", confrontou, antes de advertir de que, "non conformes", seguirán reclamando o documento.

Por último, cuestionado sobre como actuarán agora os parlamentarios da formación rupturista, avisou de que "non van cernar" a súa liberdade de expresión. "Non imos colaborar co escaparate de Feijóo e con que o Parlamento sexa unha balsa de aceite á conta disto", subliñou. Así, sentenciou que se o presidente expúlsalles das sesións "por dicir a verdade", eles estarán "ben na rúa".

"ABSURDO E INÚTIL PÓR PORTAS AO CAMPO"

Ao "informe pantasma" do 4 de xuño tamén se referiu o portavoz do PSdeG na Cámara, Xoaquín Fernández Leiceaga, para quen é "bastante absurdo e inútil tentar porlle portas ao campo".A sentenza da Gürtel, segundo incidiu, condenou "por corrupción" ao PP, e "que isto non poida dicirse nun foro onde a liberdade de expresión debía estar máis protexida" é algo que ve reprobable.Por iso, asegurou que os socialistas non se van "a someter a eses criterios", aínda que precisou que el tenta "non afectar o decoro nin á dignidade" dos integrantes da Cámara.

Para o socialista, o do presidente do Parlamento é un "intento parcial", pois "só pretende protexer ao PP" e non se comportou deste xeito, segundo sinalou, cando o xefe do Goberno galego referiuse recentemente a unha condena nos 80 ao PSOE e "non foi chamado á orde". Leiceaga constatou que Santalices será quen "terá que decidir" se aplica algún artigo do regulamento e "até onde" o aplica. "Sería bo", opinou, que aceptase un "uso amplo" do concepto de liberdade de expresión. Pola súa banda, admitiu "dificultades" para "ir máis aló", posto que o debate parlamentario "raramente" está "suxeito a un control xudicial" e a xustiza é "renuente a intervir" neste, xa que está "sometido ás súas normas".

"VULNERACIÓN DA LIBERDADE DE EXPRESIÓN"

Mentres, a viceportavoz do BNG, Olalla Rodil, cargou contra a "vulneración do dereito da liberdade de expresión" e deu a benvida, con ironía, a "1984 e o Ministerio da Verdade de George Orwell".

O Bloque "non vai aceptar ningunha mordaza no Parlamento galego" e analizará as "medidas oportunas", posto que entende que esta actuación do presidente é "escandalosa e antidemocrática", ao "instrumentalizar" aos servizos xurídicos para "amordazar" aos grupos e "dunha maneira preventiva". O fallo da Audiencia Nacional, "o primeiro de moitos", subliñou a nacionalista, "condena ao PP por corrupción, por tanto o PP é un partido corrupto". "A realidade non vai cambiar por que o PP queira censurala", resolveu.

"LEVA DEBERES"

Por último pronunciouse sobre este asunto o portavoz parlamentario do PPdeG, Pedro Puy, quen chamou a atención sobre que a liberdade de expresión dos deputados "leva deberes" como "manter o decoro e o respecto".

Así, defendeu o "dereito" do presidente da Cámara a "facer consultas" aos letrados e subliñou que o PP non tivo "nada que ver" nisto. Foi "iniciativa del", dixo, despois de agradecerlle que fixese o informe público, aínda que o que trasladou Santalices foi a nota aclaratoria con data de este luns. Desde o punto de vista de Puy, é "inxusto en liñas xerais criticar" a Santalices, a quen valorou "exercer con moderación e flexibilidade as funcións que lle corresponden", aínda que "toda labor humano pode ser mellorable" e "nun momento determinado calquera pode cometer un erro".