Os prezos industriais creceron en Galicia un 1,7% en maio, por riba da media española

Os prezos industriais creceron en Galicia un 1,7 por cento no mes de maio, seis décimas por riba da media de España, segundo os datos feitos públicos este luns polo Instituto Nacional de Estatística.

Así, o índice xeral de prezos industriais (IPRI) sitúase en Galicia en 103,9, e reflíctese un incremento do 1,7 por cento con respecto ao mes de abril. En canto á variación interanual, a subida de prezos industriais foi do 3,2 por cento (de maio de 2017 a maio de 2018), mentres que a media española foi do 2,9 por cento.

A maior taxa de variación anual rexistrouna o prezo da enerxía, cun aumento do 11,2 por cento; mentres que tanto os prezos dos bens de consumo como dos bens de equipo rexistraron un incremento do 0,6 por cento. O aumento no prezo dos bens intermedios foi do 2,9 por cento.

CONXUNTO DE ESPAÑA

Os prezos industriais en España subiron un 1,1% o pasado mes de maio en relación ao mes anterior e aceleraron o seu crecemento interanual máis dun punto, até o 2,9%. Co repunte interanual de maio, os prezos industriais encadean 20 meses consecutivos en taxas positivas.

A aceleración da taxa interanual dos prezos industriais debeuse ao repunte en case catro puntos da variación interanual da enerxía, até o 8,8%, debido ao encarecemento do refino de petróleo; e á subida da taxa interanual dos bens intermedios en tres décimas, até o 2,6%, pola alza dos prezos na fabricación de produtos químicos básicos e para a alimentación animal.

Pola contra, entre os sectores industriais con maior influencia negativa na evolución anual do índice xeral destacan os bens de consumo non duradeiro, que recortaron sete décimas a súa taxa interanual, até o -0,6%, a máis baixa desde xuño de 2014, polo abaratamento dos prezos da fabricación de aceites e graxas vexetais e, en menor medida, dos de procesado e conservación de carne.