Por GC Emprende | Santiago de Compostela | 16/07/2018 | Actualizada ás 18:00
11 empresas resultaron finalistas no Premio Peme do Ano 2018 da Coruña, convocado polo Banco Santander, a Cámara de Comercio de Santiago de Compostela e a Cámara de Comercio da Coruña en colaboración co diario La Voz de Galicia. En toda España rexistráronse un total de 567 empresas.
A presentación de candidaturas pechouse o pasado 29 de xuño e nos próximos días o xurado comezará a avaliar a documentación recibida para seleccionar a gañadora. Nesta edición do Premio Peme do Ano da Coruña poderanse conceder ata tres accésits nas categorías de Internacionalización, Dixitalización e Innovación e Formación e Emprego. Nas súas deliberacións, o xurado valorará méritos como a creación de emprego, as accións de formación para os seus empregados, a actividade internacional e as iniciativas de dixitalización e innovación.
A Peme do Ano da Coruña concorrerá ao Premio Peme do Ano 2018 a nivel nacional que se fallará no primeiro trimestre do ano próximo. Coa convocatoria deste Premio, as Cámaras de Santiago e A Coruña e o Banco Santander pretenden recoñecer o labor das pequenas e medianas empresas como xeradoras de riqueza e creadoras de emprego no desempeño do seu labor cotián.
PREMIO PEME DO ANO 2017
A primeira edición do premio Peme do Ano contou con 184 pemes finalistas. Entre elas elixiuse ás 23 empresas que se converteron en Peme do Ano 2017. En todos os casos trátase de pequenas e medianas empresas que destacan pola súa traxectoria e a incorporación de innovacións aos seus procesos de produción ou comercialización. Pertencen a sectores moi diversos, desde o agroalimentario á maquinaria, e en moitos casos convertéronse en referentes da actividade económica da súa provincia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.