Arrinca a 47 edición da Feira do Libro da Coruña

A 47 edición da Feira do Libro da Coruña abriu este mércores as súas portas nunha nova edición que se prolongará até o 10 de agosto e que incluirá encontros con autores e firmas de libros. Ao acto de inauguración, asistiron, entre outras autoridades, o conselleiro de Cultura, Educación e Ordenación Universitaria, Román Rodríguez, e o alcalde da Coruña, Xulio Ferreiro.

O conselleiro resaltou a "oportunidade" que supoñen estas feiras para pór en contacto "a todas as partes da cadea" da industria cultural. Por outra banda, sinalou que estas feiras recibiron o ano pasado en Galicia medio millón de visitantes, dos que o 70% compraron libros. Tamén destacou que o gasto medio por fogar en Galicia en libros é de 80 euros. A iso, sumou os máis de 900.000 usuarios da rede de bibliotecas públicas da comunidade autónoma.

PRÓXIMAS CITAS

Mentres, o rexedor coruñés destacou a actividade que existe na cidade en torno ao libro, "derivada da gran tradición no ámbito da promoción da lectura". Tamén subliñou a "clara vocación comunitaria" da rede de bibliotecas públicas municipais.

A Feira do Libro da Coruña chega á cidade herculina despois de celebrarse en Verín, Ferrol, Santiago de Compostela, O Porriño, Lugo, Ourense, Redondela, Ribeira, Vigo Sanxenxo, Rianxo e Ponteareas. As próximas feiras, após a da cidade herculina, serán en Viveiro, do 11 ao 15; en Foz, entre o 16 e o 19 e, finalmente, en Monforte de Lemos, do 22 ao 25 de agosto.