Por E.P. | SANTIAGO DE COMPOSTELA | 03/08/2018 | Actualizada ás 14:13
Galicia continúa no cuarto lugar das comunidades autónomas máis seguras de España, segundo recolle o balance semestral publicado este venres polo Ministerio do Interior, que reflicte que o índice de criminalidade na comunidade galega sitúase 16,8 puntos por baixo da media estatal.
Segundo o estudo, que recolle os datos da comunidade, provincias e cidades de máis de 30.000 habitantes; Galicia rexistrou na primeira metade do ano 27,7 infraccións penais por cada 1.000 habitantes.
Deste xeito, continúa coa súa tendencia e afástase da media nacional, coa que mantén unha distancia de 16,8 puntos porcentuais. A estatística indica que, de xaneiro a xuño deste ano, rexistráronse 36.595 infraccións penais en Galicia, cunha diferenza dun 2,1% respecto o mesmo período de 2017.
Entre as tipoloxías delituosas destacan os furtos --9.331--, roubos con forza --5.055-- e delitos contra a seguridade viaria --2.241--; que aglutinan case a metade de todas as infraccións penais coñecidas.
A Coruña é a provincia galega que maior taxa de criminalidade presenta, con 30,4 infraccións penais por cada mil habitantes, o que representa un incremento do 0,7 por cento respecto de 2017. En total, a provincia coruñesa rexistrou 16.647 infraccións.
Pola súa banda, Pontevedra viviu un descenso do 0,6 por cento e o índice de criminalidade situouse en 28 por cada mil habitantes, cun total de 12.773. En Lugo, a caída foi do 0,2 por cento cunha taxa de 21,1 --3.403 infraccións en total--; mentres que en Ourense subiron un 0,7 por cento até alcanzar as 23,9 infraccións por cada mil habitantes.
EFECTIVIDADE POLICIAL
En canto á efectividade policial, o balance do primeiro semestre de 2018 arroxa un aumento das dúas taxas relacionadas coa efectividade dos corpos policiais.
Así, a porcentaxe de infraccións penais esclarecidas ascende ao 43,9% (0,8 puntos máis que no mesmo período de 2017), mentres que a taxa de detidos ou investigados ascende a 246 por cada 1000 infraccións penais coñecidas (19 máis que en xuño do ano pasado).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.