Os peregrinos contarán cunha guía de emerxencias en tres linguas
A Xunta edita este documento en tres idiomas. Ademais, o Goberno galego asina un convenio con Protección Civil para dar unha "mellor atención" aos peregrinos durante o camiño.
Por E.P. | SANTIAGO DE COMPOSTELA | 17/08/2018 | Actualizada ás 15:12
A Xunta editou en tres idiomas --castelán, galego e inglés-- a 'Guía de Emerxencias para a peregrinación polos camiños de Santiago', unha publicación destinada aos peregrinos das rutas xacobeas que recolle consellos prácticos, medidas de autoprotección e información en caso de emerxencia. O vicepresidente da Xunta, Alfonso Rueda, e a directora de Turismo de Galicia, Nava Castro, presentaron este venres a guía que inclúe unha serie de apartados con consellos para antes e durante a peregrinación, como ideas para a planificación ou a preparación física necesaria, segundo explicou a Administración galega nun comunicado.
Así mesmo, a publicación ofrece información sobre o número europeo de emerxencias --112-- e explica os problemas de saúde máis frecuentes, consellos para evitalos e cando se debe solicitar asistencia sanitaria, ademais de tratar as particularidades das peregrinacións en grupo. E é que o 'Estudo do impacto socioeconómico do Camiño de Satiago' elaborado pola Universidade de Santiago de Compostela (USC), que solicitou a Xunta, concluíu que a seguridade é uns dos aspectos máis valorados polos peregrinos, segundo sinalou o Executivo autonómico. Por iso, esta iniciativa é un dos compromisos do plan director do Camiño que busca preparar a comunidade para o Xacobeo 2021.
COLABORACIÓN CON PROTECCIÓN CIVIL
Respecto diso da seguridade, o Goberno galego desenvolveu á súa vez un convenio coas agrupacións de Protección Civil de localidades situadas no Camiño de Santiago. A iniciativa xa está en marcha no Camiño Francés e este ano desenvolverase tamén no Camiño Portugués. A colaboración ten o obxectivo de prestar unha "mellor atención" aos peregrinos, para o que conta cun investimento total duns 100.000 euros por parte da Xunta.
Os voluntarios desta iniciativa desenvolverán, entre outras funcións, tarefas relacionadas coa seguridade e o apoio aos peregrinos, como información ante fenómenos meteorolóxicos adversos, revisión do estado da sinalización, atención das solicitudes de axuda e información de emerxencias ao 112.
