Caballero dá por "pechado" o debate da fusión de concellos, unha "ocorrencia" de Rajoy e Montoro
Di que a única solución para evitar o despoboamento é "dotar de recursos" a eses pequenos concellos para evitar a "desertización".
Por E.P. | VIGO | 22/08/2018 | Actualizada ás 14:48
O presidente da Federación Española de Municipios e Provincias (FEMP) e alcalde de Vigo, Abel Caballero, deu este mércores por "absolutamente pechado" o debate sobre a fusión de concellos, unha medida que tachou de "ocorrencia" do expresidente Rajoy e do exministro Montoro.
Nunha rolda de prensa, Caballero sinalou que o anterior goberno do PP puxo ese debate sobre a mesa na crenza de que "se podía aforrar", pero a realidade demostrou que "pasaba o contrario".
A ese respecto, o presidente da FEMP subliñou que os pequenos concellos e os seus alcaldes fan unha función "inestimable" e cumpren un papel esencial para evitar o despoboamento de pequenos núcleos. "Hai alcaldes de todas as cores políticas que atenden os seus pequenos municipios, e non cobran nada, debémoslles un recoñecemento", proclamou.
Segundo incidiu, a fusión de municipios pode exporse se é "voluntaria" pero non "forzada" ou "obrigada" como pretendía o PP, e recalcou que, na práctica, púxose de manifesto que esas fusións "non funcionan, non van ben".
"Ese foi un intento do goberno de Rajoy de demonizar aos concellos, de dicir que eran uns manirrotos, que malgastaban. Despois resultou que eramos os únicos garantes da estabilidade financeira deste país", proclamou o presidente da FEMP, quen lembrou que "cando chegou a hora de ver as contas, os responsables do endebedamento eran os grandes concellos, non os pequenos".
Abel Caballero foi máis aló e vaticinou que, cando se trate "en serio" o fenómeno do despoboamento, chegarase á conclusión de que a única solución é "dotar de recursos" a eses pequenos concellos para evitar a "desertización".
