A TVG ignora unha protesta con máis de 5.000 persoas na Costa da Morte

A Televisión de Galicia decidiu o pasado sábado non emitir nin un só segundo, nin nos informativos de Galicia, nin nas desconexións locais, sobre a protesta que congregou a máis de 5.000 persoas que demandan a instalación en Zas dunha planta da Inspección Técnica de Veículos (ITV) que a Xunta está retrasando.

A esta manifestación, apoiada por 12 concellos e 22 asociacións, tamén acudiron concelleiros do PP. Pero nin iso serviu para que os medios públicos se fixeran eco da noticia.  O voceiro da manifestación mesmo resaltou esta situación na lectura do comunicado que leu ó final da marcha, "unha televisión pública que pagamos todos e que nin se dignou a aparecer", sinalou.

O presentador e coñecido profesor na Facultade de Físicas, Jorge Mira, foi o encargado de ler o pregón dunha marcha que foi organizada pola Asociación do Automóbil de Baio e a Plataforma polo Desenvolvemento da Costa da Morte.  Foron eles quen instaron á Neria e á FECOM a levala ata o final.

Falta de respeto

Segundo apunta o xornal colaborador quepasanacosta, foi a propia Xunta, e concretamente o delegado territorial da Xunta na Coruña, Diego Calvo, o causante de todo esta revolta. Unha situación que estoupou na última reunión cos 20 alcaldes e empresarios da comarca e na que o deputado ninguneo á expedición costeira. "Un trato que os nosos políticos, mesmo os de cor azul, consideraron unha falta de respeto á Costa da Morte", apunta Ubaldo Cerqueiro.

E como a manifestación ía máis aló das cores políticas, encabezaron a manifestación os alcaldes de Camariñas, Carballo, Cee, Corcubión, Dumbría, Laxe, Malpica, Muxía, Zas e Santa Comba, a meirande parte deles do PSOE e do BNG. Tan só Carmen Borbujo, candidata en Vimianzo, acudiu polo bando popular.

Unha voz común

Unha vez máis, e logo da catástrofe do 'Prestige', a Costa da Morte uniuse cunha voz común. A foto de todos os alcalde unidos, e de que a protesta comezara en Vimianzo en rematara en Zas demostra que esta manifestación é un novo intento de vertebrar a Costa da Morte.

A frase máis coreada: “Estamos ata o carallo. A ITV para Baio”.


A Xunta volve culpar ao Concello

E mentres se celebraba a manifestación, a Xunta enviou unha nota de prensa na que volve incidir en que a é do Concello. A Xunta denuncia que “o polígono do Allo non está en condicións de ser urbanizado” e afirma que “a futura ITV que se ubicará en Zas será unha realidade cando estén rematadas todas as obras de acondicionamento do polígono municipal e que corresponden ao Concello”.

nha acusación que nega o alcalde de Zas que asegura que está listo para que a Xunta dea a aprobación definitiva, e sen necesidade de aportar fondos.