Máis de 3.000 galegos con rendas superiores a 150.000 euros veríanse afectados pola subida do IRPF

Máis de 3.000 galegos declaran rendas superiores aos 150.000 euros ao ano, polo que se verían afectados pola subida do IRPF que estuda implementar o Goberno central a partir deste tramo. Diso informou a Europa Press o secretario xeral do sindicato de técnico do Ministerio de Facenda (Gestha), José María Mollinedo.

Con base en datos da Axencia Tributaria de 2016 --é dicir, os presentados o ano pasado--, os declarantes totais cun nivel de ingresos superior aos 150.000 euros por todos os conceptos (renda xeral e do aforro) son 3.329 en Galicia.

Entre estes 3.329, hai 321 galegos con rendas superiores aos 600.000 euros, mentres que o resto están entre os 150.000 e os 600.000 euros. De tal forma, segundo os cálculos de Gestha, hai 3.323 contribuíntes de Galicia que pagarían uns 14,2 millóns máis polo aumento da escala de gravame estatal da renda xeral.

No tocante á renda do aforro, os 3.082 contribuíntes por encima dos 150.000 euros en Galicia pagarían uns 72,1 millóns máis polo aumento da escala de gravame.

TEÑEN MENOS PESO EN GALICIA QUE EN ESPAÑA

Segundo os datos de Gestha, os declarantes con rendas superiores a 150.000 euros en Galicia con base liquidable xeral supoñen o 0,26%, lonxe do peso que supoñen na media española (o 0,46%). Respecto dos declarantes con base liquidable do aforro, en Galicia supoñen o 0,24% os que pasan de 150.000 euros, tamén a unha distancia similar da media do Estado (0,44%).

A ministra de Facenda, María Jesús Montero, confirmou este xoves que o Goberno está disposto a explorar e estudar a posibilidade de subir os impostos ás rendas por encima dos 150.000 euros, que "evidentemente" non pertencen nin ás clases medias nin ás clases traballadoras.

Montero afirmou que o Ministerio é prudente coas negociacións, porque cre que é "necesario que teñan o seu tempo para que cheguen a bo porto". "No momento que haxa acordo así o expresaremos", apostilou a ministra.

A MEDIDA AFECTARÍA A 90.000 PERSOAS EN ESPAÑA

Os técnicos do Ministerio de Facenda, Gestha, calculan que a subida do IRPF ás rendas superiores a 150.000 euros afectaría en España ao 0,46% dos declarantes, é dicir, a 90.788 persoas, o que lle permitiría recadar uns 400 millóns de euros. Así mesmo, estiman que os afectados deberían pagar cada ano unha media de 4.400 euros máis, o que se traduciría nun incremento do 2,1% da súa factura fiscal.

No entanto, Gestha destaca que a recadación que se lograría con esta medida podería aumentar noutros 1.500 millóns se se alcanzase un acordo para equiparar a tributación das rendas do aforro coa da renda xeral para quen perciban rendementos do capital de máis de 50.000 euros e ingresen rendas totais por encima dos 150.000 euros, segundo apuntan as negociacións.

Neste caso, os técnicos sinalan que estarían afectados unicamente o 0,44% dos perceptores das maiores rendas do capital, 86.198 persoas, quen abonarían un pago adicional duns 17.300 euros, o que suporía un aumento do 15,7%.