Por E.P. | SANTIAGO DE COMPOSTELA | 31/08/2018 | Actualizada ás 15:00
O Comité de Plan de Calor da Xunta alerta de situacións de "intensa" calor durante toda a fin de semana. Os termómetros superarán os 30 graos "con facilidade" na metade sur de Galicia, con zonas que permanecerán con aviso amarelo por temperaturas máximas nas xornadas do sábado e o domingo, primeiros días do mes de setembro.
Así mesmo, as mínimas non descenderán por baixo dos 20 graos en puntos da provincia de Pontevedra e o oeste da Coruña, co efecto de noites tropicais. Nun comunicado, a Consellería de Sanidade explicou que esta situación se dará polo achegamento dunha masa de aire cálido procedente do sur da península e do norte de África.
Así, estímase que na tarde do domingo poderanse formar os primeiros fenómenos tormentosos, de modo que as nubes e os chuvascos poderán ser algo máis xeneralizados o luns, día no que as temperaturas descenderán por baixo dos limiares de perigo.
Ante a calor, Sanidade recomenda beber máis líquido do habitual sen chegar a ter sede, sobre todo auga, zumes e froita lixeiramente fríos, á vez que suxire comer verduras. Pola contra, deberá evitarse inxerir comidas copiosas e bebidas quentes, alcohólicas, café, té e as moi azucaradas.
Ademais, a Xunta recomenda evitar actividades en exteriores nas horas máis calorosas e reducir a actividade física. Así mesmo, convén non ir á praia nas horas de máxima calor --mediodía e a primeiras horas da tarde-- e utilizar as cremas solares de máxima protección posible.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.