O PP presidirá as comisións de investigación do Marisquiño e da Sanidade ademais de ter o control coa súa maioría

O PPdeG presidirá as dúas comisións de investigación que este xoves se constituíron no Parlamento de Galicia. Unha indagará sobre o accidente ocorrido o pasado 12 de agosto en Vigo, durante a celebración do festival O Marisquiño; mentres que a segunda delas estudará a situación do sistema sanitario público e se os "recortes" afectaron na calidade do servizo, após a morte dun home nunha PAC da Estrada este verán.

Aínda que as dúas comisións foron a petición dos grupos da oposición (a do accidente de Vigo sen o apoio do PSOE), o PPdeG, como forza maioritaria da Cámara, mantén este status en ambos os órganos parlamentarios, de maneira que ten o control dos tempos, do plan de traballo e mesmo do informe final do relatorio.

O PPdeG presidirá as dúas comisións e tamén ostentará a vicepresidencia de ambas. En Marea, pola súa banda, terá a secretaría dos dous órganos parlamentarios (na do Marisquiño contou co voto a favor do BNG e na de Sanidade, co voto favorable do PSdeG).

Así, a deputada popular Marta Rodríguez Arias presidirá a comisión que indagará sobre o sistema sanitario, mentres que ocupará a Vicepresidencia o popular Jesús Miguel Prado Patiño. A deputada de En Marea Eva Solla, por parte da oposición, sentará no posto de secretaria.

Nesta comisión, os populares achegan sete dos 12 membros: Aurelio Núñez Centeno, Marta Rodríguez Arias (presidenta), Encarna Amigo (á que substituíu Cristina Romero), Marta Rodríguez-Vispo, María Guadalupe Murillo Solís (á que substituíu este xoves Marián García Míguez), Antonio Mouriño e Jesús Miguel Prado Patiño (vicepresidente).

Por parte de En Marea figuran o portavoz parlamentario, Luís Villares, e a responsable sanitaria, Eva Solla (secretaria); mentres que o PSdeG achega ao titular na materia, Julio Torrado, e ao seu portavoz parlamentario, Xoaquín Fernández Leiceaga. O BNG sitúa nesta comisión ao seu líder, Ana Pontón.

A comisión pretende determinar as "consecuencias dos recortes e privatizacións sobre o sistema sanitario galego (2009-2018), con especial incidencia en casos como a non dispensación de medicamentos necesarios a enfermos de Hepatite C ou o falecemento dun paciente sen atención na PAC da Estrada".

Foi impulsada polo tres grupos da oposición, facendo uso da prerrogativa parlamentaria que lle dá o regulamento para activar unha comisión de investigación sen apoio do grupo maioritario, unha vez por lexislatura.

COMISIÓN DE O MARISQUIÑO

En canto á comisión que investigará o accidente do festival, será a deputada do PPdeG Cristina Romero Fernández a que presida o órgano xunto Jacobo Moreira como vicepresidente. A deputada de En Marea Carmen Santos será a secretaria.

Arrincan así os traballos para esclarecer as causas do sinistro que deixou 467 feridos na ciudada olívica, onde goberna por maioría absoluta Abel Caballero (PSdeG).

Integran a comisión por parte do PPdeG: Teresa Egerique, Alberto Pazos, Marián García Míguez, Paula Prado, Cristina Romeu (presidenta), Jaime Castiñeira e Jacobo Moreira (vicepresidente da comisión).

De En Marea estará o portavoz parlamentario, Luís Villares, e a viceportavoz segunda, Carmen Santos (secretaria da comisión). Do PSdeG, conformarán este órgano o vigués Abel Losada e a pontevedresa Patricia Vilán; mentres que Montse Prado substituíu este xoves a Luís Bará, que ocupará o escano do BNG.

REGULAMENTO E TRABALLOS

Após a constitución formal das comisións, agora é quenda para deseñar o regulamento de funcionamento das comisións, o que, segundo as fontes parlamentarias consultadas por Europa Press, podería estar listo a primeira semana de outubro.

A partir de aí, até pasada a metade do próximo mes non concluiría o prazo para presentar as propostas de traballo que, en todo caso, hai que aprobar nunha nova sesión da comisión de investigación por maioría e que, suporía, o arranque efectivo dos traballos.