O Goberno envía medios aéreos e humanos para extinguir os incendios de Mondariz e Pedrafita

O Ministerio de Agricultura, Pesca e Alimentación enviou, desde primeiras horas da mañá deste luns, medios aéreos e humanos para apoiar á comunidade autónoma de Galicia na extinción dos incendios declarados en Mondariz, en Pontevedra, e Pedrafita do Cebreiro, en Lugo.

Ao incendio de Mondariz enviou, por segundo día consecutivo, especialistas nos labores de extinción e medios aéreos, para colaborar desde terra e aire na loita contra as chamas.

Dous avións anfibios de gran capacidade, dous helicópteros e unha Brigada de Reforzo contra Incendios Forestais desprazáronse á zona. Mentres, tamén se enviou un helicóptero de gran capacidade a incendio de Pedrafita do Cebreiro.

Segundo explica o ministerio nunha nota de prensa, despregáronse medios aéreos e humanos para colaborar na extinción dos lumes "durante a fin de semana, e atendendo ás peticións da comunidade autónoma de Galicia".