Por X.M. Fernández | Allariz | 09/11/2018 | Actualizada ás 11:07
O evento gastronómico ten por obxectivo promover, potenciar e valorizar os produtos de outono. O recinto feiral central será, como xa é costume, o pavillón do Instituto de Allariz onde corenta e tres produtores galegos venderán mel, cogomelos, noces, castañas e os seus derivados, entre outros.
Outro dos puntos de interese da Feira de Outono é o Mercado da Reserva da Biosfera, lugar onde se realizarán diferentes concursos de elaboracións gastronómicas, degustacións e demostración de cociña en vivo a cargo de cociñeiras/os e blogueiras/os gastronómicos. Ao longo da fin de semana haberá tamén sorteos e actividades para pequenos/as e maiores.
Os restaurantes e taparías da vila ofrecerán menús e tapas elaboradas con produtos de outono durante a fin de semana e sortearán un menú para dúas persoas para aqueles que desgusten o outono nalgún dos establecementos participantes.
MICOLOXÍA
O sábado 10 pola mañá resulta interesante unha saída ao monte na procura de cogomelos co acompañamento do experto José Gómez Bragaña (Centro de Investigacións de Lourizán). A saída é ás 10:00 da mañá desde o pavillón feiral e aconséllase inscrición previa no correo participa@allariz.com
Neste apartado de cogomelos cómpre saber que haberá unha exposición micolóxica no Mercado de produtos da Reserva da Biosfera en horario de 11:00 a 14:00 e de 17:00 a 20:00 h. Unha exposición que amosará as variedades máis comúns de cogomelos que se poden atopar nos montes alaricáns. Colabora na mesma o Centro de Investigacións de Lourizán.
Na web do concello de Allariz pódese acceder ao programa de actividades ao detalle.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.