Granxas galegas preocupadas polas dificultades no pago das contías a percibir trala ampliación da PAC

O Sindicato Labrego Galego (SLG) solicita, ante a confirmación da ampliación do prazo de tramitación da Política Agraria Común (PAC) ata o 31 de maio, que esta non teña "prexuízos directos" para agricultores e agricultoras. "Principalmente, o atraso no pago das contías a percibir", sinala. "Dificultade para afrontar créditos que vencen a final de ano, imposibilidade de cubrir facturas ou de acometer melloras técnicas necesarias son algúns dos problemas que virían a engadir ás complicacións cotiás que levaría a demora no pago, agravando a vulnerabilidade económica das granxas galegas", indica nun comunicado.

Nel, recalca que nin agricultores nin agricultoras nin entidades tramitadoras pediron "nunca" a dixitalización da tramitación da PAC. "É máis, desde que comezamos con este sistema, non deixamos de notificar erros e incidencias na aplicación informática", explica o sindicato. Do sistema, afirma que xera "incerteza e preocupación" entre as persoas solicitantes e apunta que non existen, "polo menos no Estado español", as condicións técnicas "para que un proceso desta complexidade sexa tramitado electronicamente cunha fluidez razoable".

Varias vacas leiteiras, da raza bovina frisoa, comen penso e cereais, nas instalacións dunha granxa | Fonte: Isabel Infantes - Arquivo