Comeza a demolición da pirotécnica de Tui co dono investigado por unha explosión que causou dúas mortes
Antes das operacións para a derriba, procedeuse a desaloxar o material explosivo que aínda se gardaba no interior das instalacións.
Por Europa Press / Redacción | VIGO | 12/12/2018 | Actualizada ás 20:41
Os traballos de demolición da empresa La Gallega, en Tui (Pontevedra), cuxo propietario está investigado pola explosión dun almacén ilegal de material pirotécnico na parroquia tudense de Paramos (que custou a vida a un matrimonio, causou decenas de feridos e cuantiosos danos materiais) comezaron este mércores, segundo comunicou o Concello desta localidade.
Co inicio desta demolición dáse cumprimento á sentenza dun xulgado contencioso administrativo de Pontevedra, que obriga a desmantelar e cesar a actividade desta pirotecnia, situada na parroquia de Baldráns.
Antes das operacións para a derriba, procedeuse a desaloxar o material explosivo que aínda se gardaba no interior das instalacións, uns 2.800 quilos, que foron trasladados e destruídos por efectivos do TEDAX e de Intervención de Armas da Garda Civil.
Así, este mércores realizouse a retirada do amianto (para o que o Concello xa contaba con informe favorable do Instituto Galego de Seguridade e Saúde Laboral) e serán demolidas unhas 25 casetas.
O alcalde de Tui, Carlos Vázquez Padín, estimou que os traballos de derriba poderían estar culminados antes de que acabe o ano, aínda que o xulgado ampliou até o 15 de xaneiro o prazo para executar a sentenza.
