Golpe do Tribunal Superior ao Concello de Vigo por vetar a PassVigo aos non empadroados

O TSXG ratifica a suspensión do requisito de empadroamento para obter a tarxeta de transporte.

Por Galicia Confidencial | Vigo | 20/12/2018 | Actualizada ás 19:27

Comparte esta noticia

A sección segunda da sala do Contencioso Administrativo do Tribunal Superior de Xustiza de Galicia (TSXG) rexeitou o recurso presentado polo Concello de Vigo e ratificou a medida cautelar de suspender o requisito do empadroamento para solicitar e obter a tarxeta PassVigo.

Tarxeta PassVigo, para o transporte metropolitano nesta cidade
Tarxeta PassVigo, para o transporte metropolitano nesta cidade | Fonte: Concello de Vigo

O xulgado do Contencioso Administrativo número 1 de Vigo ditou un auto en abril no que suspendía a condición de estar empadroado na cidade olívica para poder obter este cartón, que se usa como medio de pago do bus urbano a prezo bonificado.

Esta medida cautelar fora solicitada polo Concello de Redondela, que presentou un contencioso contra o Concello de Vigo por esixir ese empadroamento (deixando fóra, por tanto, aos veciños doutros municipios, entre eles o de Redondela, a pesar de que o bus urbano de Vigo chega até a parroquia redondelana de Chapela).

O Concello de Vigo recorreu ese auto, pero agora o alto tribunal galego ratifica a suspensión acordada polo xulgado vigués, ao entender que esa medida non está fundamentada no Plan de Transporte Metropolitano, e que é "clara" a vantaxe tarifaria de usar ese cartón porque as viaxes de bus teñen prezo reducido.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta