O comité de Navantia Ferrol celebra o fito da botadura da fragata F-111 pero esixe melloras laborais e de investimento
"As traballadoras e traballadores cumprimos", proclamaron, polo que reclamaron á dirección da compañía, das auxiliares e ao Goberno central que dean pasos concretos para atender as demandas históricas da comarca.
Por Europa Press / Redacción | FERROL | 10/09/2025 | Actualizada ás 14:39
O comité de empresa de Navantia Ferrol cualificou de "día histórico" este xoves pola botadura da fragata F-111 (da serie F-110) e destacou que se trata do primeiro buque dunha serie que considera "a máis avanzada do mundo", situando aos estaleiros galegos como "referente internacional na construción de fragatas". O comité subliñou que o éxito do programa débese "ao persoal altamente cualificado e comprometido", tanto de Navantia como das empresas colaboradoras, a quen expresou o seu agradecemento. "As traballadoras e traballadores cumprimos", proclamaron.
Non entanto, a representación sindical reclamou á dirección da compañía, das auxiliares e ao Goberno central que dean pasos concretos para atender as demandas históricas da comarca. Entre elas, figuran a aplicación do convenio provincial do metal a todas as empresas que operan no estaleiro, a posta en marcha dun coeficiente reductor para a xubilación nas profesións ligadas ao sector naval e un maior investimento en infraestruturas.
O comité reclamou tamén "a modernización de instalacións, a construción de novos diques e a potenciación da fábrica de turbinas", co obxectivo de afrontar encargos tanto militares como civís. Ademais, esixiu ampliar de forma significativa o persoal mediante procesos de incorporación máis áxiles e plans de formación para novos perfís profesionais. "É o momento de apostar polo sector naval na ría", insistiron, e engadiron que unhas instalacións actualizadas, persoais suficientes e condicións laborais estables son "imprescindibles para garantir o futuro do estaleiro".
