(Vídeo) Preto dun milleiro de persoas bloquea o tramo final da Volta en Mos: "A etapa de hoxe gañouna Palestina"

Preto dun milleiro de persoas bloquearon o tramo final da etapa da Volta Ciclista a España en Mos, que tivo que rematar 8 quilómetros antes da meta prevista debido a protestas a favor do pobo palestino. A concentración, convocada pola Plataforma Cívica Vigo Prol-Palestina no Alto de San Cosme, criticou a participación do equipo Israel Premier Tech e denunciou que a competición “blanquea o xenocidio”. Durante a protesta, os manifestantes corearon consignas como “A Volta patrocina o xenocidio en Palestina”, “Non é unha guerra, é un xenocidio” ou “Palestina vencerá”.

A tensión aumentou cando os manifestantes formaron un tapón humano na estrada, obrigando á intervención de Policía Nacional e Garda Civil, que crearon un cordón de seguridade para desaloxalos. Finalmente, a organización da carreira decidiu suspender a competición 8 quilómetros antes da meta para evitar altercados. A concentración, que durou arredor de dúas horas, contou con numerosas bandeiras palestinas, carteis en favor de Palestina e berros dirigidos tamén aos corpos de seguridade, aos que acusaban de “cómplices”.

A pesar da intensidade da protesta, non se rexistraron detencións este martes, a diferenza do que ocorreu o domingo pasado en Lugo. Ao longo da xornada, os operarios pintaron de negro bandeiras e mensaxes propalestinos presentes en distintos tramos do percorrido, mentres que en Pontevedra o alcalde Miguel Ángel Lores asistiu á mobilización.

REMATA A 8 KM DA META

A décimo sexta etapa da Volta, que se está disputando entre Poio e Mos-Castro de Herville sobre 167,9 quilómetros, acabará a 8 quilómetros da liña de meta debido ás novas protestas a favor do pobo palestino, segundo informaron os organizadores da rolda española a través de Radio Vuelta.

A gran cantidade de manifestantes propalestinos nos quilómetros finais da carreira obrigou á organización a cancelar a etapa antes de tempo xa que era imposible o seu paso, a non ser por cargas masivas da Policía.  "Debido a unha protesta que está a bloquear a carreira, o gañador de etapa e os tempos para a clasificación xeral decidiranse a 8 quilómetros para a liña de meta", informou La Vuelta na súa web oficial. De feito, ao longo dos quilómetros finais tamén había árbores na estrada impedindo o paso.

O español Mikel Landa (Soudal Quick-Step) e colombiano Egan Bernal (Ineos Grenadiers) forman o dúo que é cabeza de carreira.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)