Os grupos sanguíneos A- e A+, con baixo nivel de reservas
A Axencia de Doazón de Órganos e Sangue desprazará unidades móbiles por concellos das catro provincias o vindeiro luns 14. Lembra que para atender as necesidades dos centros sanitarios, son precisas 500 doazóns diarias
Por E.P. | SANTIAGO DE COMPOSTELA | 10/01/2019 | Actualizada ás 11:13
As reservas dos grupos sanguíneos A Positivo (A+) e A negativo (A-) permanecen en nivel baixo en Galicia, mentres que as de Cero Negativo (0-) e Cero Positivo (0+) están normais, segundo a información facilitada este xoves pola Axencia de Doazón de Órganos e Sangue (ADOS).
ADOS recorda que para poder atender as necesidades dos centros sanitarios galegos son necesarias 500 doazóns de sangue cada día, polo que subliña a importancia de acudir a doar de todos os grupos sanguíneos.
Co fin de facilitar a doazón, o vindeiro luns, 14 de xaneiro, ADOS desprazará unidades móbiles aos municipios coruñeses das Somozas -diante do Concello-, Cambre -O Temple-, As Pontes -CIFP Paseo das Pontes- e Ames -rúa Cruxa en Milladoiro-. Tamén acudirán unidades móbiles á localidade luguesa da Fonsagrada -fronte ao museo- e á ourensá de Cortegada -á beira do Santander-.
Así mesmo, estarán o luns nos municipios pontevedreses de Cambados -xunto ao centro de saúde-, Nigrán -diante do Concello- e Vigo -diante do centro cultural de Bembrive-.
