Unha veciñanza unida para impedir un macrovertedoiro en Teo

A Plataforma Casalonga Limpa de Residuos celebrou onte, venres 18 de xaneiro unha asemblea que xuntou á veciñanza e que confirmou o apoio cidadán ao traballo da asociación. O colectivo dirixe os seus esforzos a impedir a instalación dun "macrovertedoiro encuberto" na antiga canteira de Casalonga (Teo - A Coruña). Logo de dúas "vitorias" que conseguiron frear o proxecto, prepáranse para seguir a batalla ante posibles movementos da empresa dona dos terreos.

Segundo explican dende a plataforma, o evento tivo lugar ás 20.30h de onte nos baixos do restaurante San Martiño, onde "numerosos asistentes lexitimaron á coordinadora" e aprobaron a pertenza da entidade á rede de plataformas Compostela-Ulla-Tambre.

Dito colectivo naceu hai 8 meses, momento no que os habitantes do concello de Teo coñeceron o proxecto para o establecemento dunha planta de residuos de "dimensións espectaculares" na canteira de Casalonga, "unha zona restaurada pola natureza e con núcleos de poboación a escasos metros", segundo sinalan dende a Plataforma. 

Os veciños afaenáronse dende o primeiro momento en expresar a súa oposición a tal proposta. "Imposible pasar por este lugar sen ver os centos de pancartas rexeitando a súa instalación", relatan. Precisamente os continuos xestos de desacordo ante eses plans foron os que conseguiron poñerlles freos.

DÚAS "VITORIAS", Á ESPERA DA DEFINITIVA

Deste xeito, as accións ao respecto estiveron ben presentes. De festivais reivindicativos ata cadeas humanas, pasando por escritos remitidos ao Ministerio; estes oito meses de vida da asociación estiveron cheos de actividades.

A primeira mostra disto foi unha andaina organizada o 17 de xuño, con resultado de "asistencia masiva". Tamén se levaron a cabo charlas informativas para manter o diálogo co Concello, cos partidos políticos e con outras plataformas. O festival "DesPlanta Sons", celebrado durante as festas do Carmelo, foi a segunda visibilización da resposta cidadá. Nel, artistas e empresas da zona "arrimaron o ombreiro poñendo o seu traballo á disposición da plataforma".

As continuas protestas cidadáns lograron parar a instalación da planta de tratamento de residuos, unha "primeira vitoria", pero aos poucos días a empresa dona dos terreos anunciou un plan de restauración da canteira que, segundo os integrantes da plataforma, "camuflaba" a instalación dun macrovertedoiro cunha capacidade de 9.000 toneladas de residuos.

De novo, a protesta social foi contudente: habitantes da contorna formaron unha cadea humana de 2 quilómetros que cercou a canteira. "Diálogos continuos cos grupos políticos e con outras plataformas, panos e mandís enchendo a feira do San Martiño, presentacións de escritos pedindo cambios lexislativos a nivel do Concello, autonómico e estatal, e outras accións conseguiron frear a instalación do vertedoiro encuberto", aplauden.

Esas accións conseguiron, de novo, frear a instalación dese "vertedoiro encuberto". Considérano, entón, unha "segunda vitoria" que, porén, aínda non ven definitiva. Á espera dun novo paso por parte da empresa, a veciñanza prepárase para seguir loitando. "Sempre que a empresa presente algo, como sabemos as súas intencións reais, vainos ter en fronte", sentenciou un integrante da plataforma no peche da asemblea.