Por Europa Press / Redacción | SANTIAGO DE COMPOSTELA | 20/01/2019 | Actualizada ás 14:04
A polémica das competicións de caza de raposo trascendeu as asociacións animalistas e volve estar ás portas do Parlamento galego, desta volta da man do PSdG. A portavoz de Medio Ambiente do citado partido, Patricia Vilán, reclamou este domingo á Xunta que paralice as subvencións a calquera novo campionato de caza de raposos, "polo menos ata dispor de datos sobre a situación deste animal".
Tal como sinalou o Partido Socialista galego nun comunicado, a responsable de Medio Ambiente presentou unha proposición non de lei na que reclama ao Goberno da comunidade un informe sobre a poboación de raposos e os "supostos prexuízos que avalen o seu control".
A deputada socialista lembrou que o artigo 72 da lei 13/2013 autoriza a caza deste animal co fin de "protexer, conservar, fomentar e aproveitar ordenadamente os recursos cinexéticos", finalidade que, a xuízo de Vilán, non parece cumprirse coa caza de raposos. "Aparenta ter un interese meramente lúdico-festivo", di ao respecto dos motivacións tras estes torneos.
Segundo Vilán, a Sociedade Galega de Historia Natural (SGHN) puxo en dúbida a existencia de datos que avalen a densidade e a tendencia das poboacións destes animais, así como os prexuízos derivados da súa presenza que apoien o control da poboación.
Así mesmo, segundo o PSdeG, a SGHN destacou a importancia desta especie no aspecto sanitario, xa que eliminan pequenos roedores prexudiciais para o ser humano, así como no equilibro ecolóxico, ao desfacerse de restos de animais mortos.
Vilán recordou que a propia Xunta, a través do grupo Popular, votou a favor dunha proposición non de lei para non subvencionar esta actividade, "non apoiala, nin participar na súa promoción e desenvolvemento". A proposta definía este tipo de torneos como unha "inxustificada competición de morte de fauna silvestre".
Os socialistas darán traslado desta petición ao Parlamento de Galicia a través da presentación dunha Proposición non de Lei para o seu debate na cámara galega.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.