Por Europa Press / Redacción | SANTIAGO DE COMPOSTELA | 25/01/2019 | Actualizada ás 13:59
Os socios do Bloque Nacionalista Galego (BNG) na coalición para as eleccións europeas, EH Bildu e Esquerra Republicana de Catalunya (ERC) tamén se pronunciaron sobre o veto do Bloque a que Anova poida formar parte desta candidatura, pero non aclararon se están totalmente en contra, especialmente, ERC, con que Beiras mantén moi boas relacións.
"Respectamos a posición do BNG", sinalou o candidato de EH Bildu, Josu Juaristi, durante a presentación da candidatura 'Agora Repúblicas', celebrada este venres en Santiago de Compostela.
Tras o rexeitamento expresado o pasado xoves pola líder frontista, Ana Pontón, ao ofrecemento efectuado polo histórico dirixente nacionalista e referente de Anova, Xosé Manuel Beiras; vascos e cataláns evitaron confirmar se pechan definitivamente a porta á incorporación de Anova, partido xurdido tras a ruptura do BNG en 2012.
O pasado mércores, na súa reaparición pública logo de meses de silencio, Xosé Manuel Beiras -líder do BNG durante dúas décadas- abrazaba a proposta efectuada polo coordinador xeral de EH Bildu, Arnaldo Otegi, na que apostou por crear unha alianza para as xerais que fora "do PNV á CUP".
Beiras manifestou o seu agrado pola proposición e chamou a iniciar conversas para a incorporación de Anova na candidatura das forzas independentistas vascas, catalás e galegas para as eleciones europeas do 26 de maio. Porén, Pontón pechaba a porta o pasado xoves nunhas declaracións nas que pediu "seriedade" a Beiras, xa que, segundo a líder frontista, non existe ningunha proposta sobre a mesa.
A postura do Bloque foi apoiada polos seus socios na candidatura. Josu Juaristi matizaba que, coa súa proposta, Arnaldo Otegi non pretendía "inmiscirse nas cuestións de Galicia". "O meu maior respecto á posición de Bloque", engadiu o político vasco. Pola súa banda, a representante de ERC no acto, Diana Riba, non quixo intervir.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.