Por Galicia Confidencial | Touro | 05/02/2019 | Actualizada ás 19:29
A asociación Aldea Viva acusa ao Concello de Touro de estar “a utilizar as cunetas dunha pista municipal como vertedoiro dos residuos das súas propias obras e construcións”. Denuncian que os restos depositados nas veiras desta pista son “restos de formigón, tella ou restos cerámicos misturados con diversidade de materiais plásticos e residuos altamente contaminantes como restos de illamentos de poliuretano”. O traxecto afectado segundo a asociación é a pista que vai dende a Residencia da 3ª Idade até o lugar de A Cruz de Méndez, en Touro.
Aldea Viva suliña ademais que sendo a administración local a que ten que velar polo cumprimento da legalidade “é a primeira que a incumpre”, engadindo a isto a “elevada capacidade contaminante dalgúns dos residuos”. A xuízo da asociación veciñal, o Concello “exponse a sancións ou multas por parte da consellería competente en medio ambiente; multa que se pagaría co diñeiro das veciñas/os e nunca co diñeiro do alcalde ou concelleiro de obras”.
Aldea Viva pediu a dimisión do concelleiro delegado de Obras, Jesús Martínez Pereira, ademais da retirada e tratamento axeitado dos residuos. “A nefasta xestión do concelleiro Jesús Martinez Pereira no departamento de obras municipais é recorrente, foi Alcalde accidental no mes de agosto pasado cando o concello executou obras de canalización do rego Portapego”. Ditas obras, sinalan “sen autorización preceptiva de Augas de Galicia, o que derivou en actuacións polo este organismo que aínda están abertas”.
Ditas obras son cualificadas desde a asociacion como “infrutuosas tal como demostraron as últimas treboadas, pretendían ampliar a capacidade do río para que os lodos e residuos da Mina de Touro vertidos non entullaran”. O último feito relacionado con estas obras sucedeu o mes pasado cando “os lodos da mina de Touro rebordaron novamente polas rúas de Fonte Díaz”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.