Feijóo ofrece Galicia ao sector dos cruceiros de Miami

O presidente galego, Alberto Núñez Feijóo, presentou ao porto de Miami e ás compañías de cruceiros "as oportunidades que Galicia ofrece en turismo e construción naval", na terceira das xornadas da súa visita na cidade do Estado de Florida.

Feijóo mantivo este xoves "unha intensa xornada de traballo", segundo destaca a Xunta, marcada pola visita ao Porto de Miami. Despois reuniuse con empresas relacionadas co sector do 'contract', co obxectivo de que o sector galego "siga sendo unha referencia internacional, con presenza nos principais proxectos de todo o mundo".

O titular do Executivo galego visitou a terminal de colectores e a de cruceiros, para logo entrevistarse coas principais compañías de cruceiros no condado de Miami.

"Queremos que Galicia se coñeza nas rutas cara a Europa e que as autoridades portuarias, autoridades políticas e os operadores de Miami coñezan as posibilidades que ofrece a comunidade de face a establecer contactos estables e fiables", destacou.

Así mesmo, resaltou a capacidade de Galicia para dar resposta á necesidade de construción de cruceiros nos próximos anos, xa que a demanda aumenta cada ano. Niso, viu unha "oportunidade" para o naval galego.

No ámbito das mercadorías, fixo fincapé na situación "estratéxica" do Porto de Miami, unha das principais portas de entrada de Estados Unidos.