Por Europa Press / Redacción | SANTIAGO DE COMPOSTELA | 09/02/2019 | Actualizada ás 14:05
O 061 contabilizou máis dunha trintena de ambulancias picadas ata as 12,30 horas deste sábado, na que é a segunda xornada de folga de traballadores do sector. Os sindicatos, pola súa banda, protagonizaron concentracións ante diversos hospitais da comunidade.
De acordo cos datos recompilados pola Xunta, entre as 00,00 horas do venres 8, cando arrincou o paro, ata as 20,00 horas, foron rexistrados un total de 23 picadas, así como pintadas en cinco ambulancias.
Desde as 20,30 horas do venres e ata as 9,00 horas deste sábado, ao 061 cónstanlle rodas picadas nas ambulancias con base en Silleda, Redondela, Muros e Ponteareas.
Desde entón e ata as 12,30 horas, sinala que se picaron as rodas das ambulancias con base en Cangas, Carballo, Silleda, Redondela e Melide.
Respecto diso, mostrou a súa firme condena a este tipo de "sabotaxes e actos vandálicos", e subliña que traballan "para garantir o servizo" e "seguir tentando dar a mellor atención asistencial".
Pola súa banda, os sindicatos desenvolveron actos de protesta este sábado en varios hospitais comarcais, como o do Barbanza e O Salnés.
O portavoz da CIG, Inacio Pavón, explicou que durante a fin de semana hai normalmente menos persoal traballando posto que as quendas son "máis pequenas".
Así, cifrou de novo nun 100% o seguimento (os servizos mínimos son do 100%) nunha folga que cualificou como "moi sentida" entre os traballadores. Este domingo, mentres, trasladaranse a Santiago para secundar a manifestación en defensa da sanidade pública.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.