Betanzos, pioneira en España no uso de cans de terapia con menores vítimas de violencia de xénero
O proxecto está impulsado pola Fundación María José Jove e Apico, e aplicarase tamén en Curtis e a área metropolitana coruñesa.
Por Europa Press / Redacción | A CORUÑA | 21/02/2019 | Actualizada ás 16:42
Cans de terapia acompañarán a menores vítimas de violencia de xénero cando declaren no xulgado e tamén recibindo un programa paralelo de atención durante varios meses nun proxecto pioneiro en España, impulsado pola Fundación María José Jove e a Asociación pola Igualdade e a Coeducación (Apico).
Así o informaron, na súa presentación, a presidenta da Fundación María José Jove, Felipa Jove, e a secretaria de Apico, Lucía Seco, acompañadas do xuíz decano de Betanzos e titular do Xulgado de Violencia contra a Muller, Roberto Barba. Xunto a eles estiveron os tres cans de terapia que participarán neste programa, financiado pola Fundación María José Jove.
Trátase dun programa piloto xa en marcha desde o mes de febreiro no Xulgado de Violencia contra a Muller de Betanzos, que consiste en que cada menor involucrado en episodios de violencia de xénero que teña que declarar ou pasar calquera trámite neste xulgado irá acompañado dun dos cans.
Ao animal xa o coñecerán nas sesións de terapia que recibirán durante varios meses e con carácter quincenal. "Trátase de mellorar a autoestima, de diminuír a ansiedade, que os nenos se liberen dos seus medos", explicou Lucía Seco.
Pola súa banda, Felipa Jove remarcou que se recorrerá aos cans pola "capacidade que teñen para mellorar a autoestima". Mentres, o xuíz Roberto Barba subliñou que, nos casos de violencia de xénero, se esquece moitas veces aos menores. "É unha boa iniciativa para buscar e facilitar a colaboración do menor, a súa integridade e a súa protección", apostilou.
As terapias a menores nesta situación levaranse a cabo na área metropolitana coruñesa, Betanzos e Curtis. As solicitudes deberán realizarse con 24 horas de antelación e prestarase o servizo durante todo este ano.
Nesta primeira experiencia piloto, coa participación de cans que xa traballaron con persoas maiores ou con diversidade funcional, os menores poderán acceder a esta posibilidade a través da Garda Civil de Betanzos, do Centro de Información á Muller de Curtis ou da Asociación Mirabel.
