A Xunta destaca que aposta polo "ensino público", aínda que destina o 11% do orzamento á concertada

A conselleira de Educación, Universidade e Formación Profesional, Carmen Pomar (Santiago, 1970), descarta a recentralización de competencias autonómicas en canto ao ensino. "Creo que aquí (en Galicia) non temos que facer ningún tipo de cambio a ese nivel, porque creo que mantemos un perfecto equilibrio entre o que é o respecto á Constitución española e ao Estatuto de Autonomía", apunta.

Así respondeu, nunha entrevista concedida a Europa Press, ao ser preguntada sobre propostas de recentralización no ensino que levarán algunhas formacións, entre elas o Partido Popular, no seu programa ás eleccións xerais do 28 de abril. Deste xeito, dise "firme defensora" de alcanzar un gran pacto pola educación, sector que lamenta está "tan sometido a intereses de carácter político".

"Apaixonada do mundo educativo" e "da infancia", Pomar exercía como profesora nas facultades de Educación e Psicoloxía da Universidade de Santiago de Compostela (USC) ata que o presidente da Xunta, Alberto Núñez Feijóo, chamouna o pasado mes de setembro para liderar a Consellería que ata entón dirixía Román Rodríguez, agora á fronte de Cultura e Turismo.

Cinco meses despois da súa chegada a San Caetano, valora que a súa formación "probablemente marca un estilo diferente" ao do seu antecesor. "Nin mellor nin peor, senón diferente", puntualiza, negando ademais ter "ningún tipo de aspiración oculta" en política: "O que me leva a estar aquí é axudar a que o sistema educativo en Galicia siga camiñando por un bo carreiro".

En clave estatal, Pomar móstrase crítica coa oitava lei educativa da democracia anunciada pola ministra Isabel Celaá hai unha semana --a Lomloe, tamén coñecida como 'Lei Celaá--. "Algo falla cando estamos ante unha oitava reforma e cando cada lei que sae pómoslle o apelido do ministro que a aproba", apunta.

 "LEI FANTASMA"

Tras valorar que a Lomce, aprobada en 2013 polo entón ministro de Educación, José Ignacio Wert, "probablemente tiña cousas interesantes" e outras "que non o eran", a conselleira tacha de "lei fantasma" e "superficial" a que pretende impulsar agora o Goberno de Pedro Sánchez, o que achaca a unha "obsesión case enfermiza de levar esta lei ao Consello de Ministros" e á "falta de tempo" nunha lexislatura cuxo fin xa foi anunciado.

"Empeza a parecer máis unha especie de 'saírnos coa nosa' e de dicir 'isto vai saír si ou si', e creo que iso é perigoso en educación", engade. Ademais, Pomar cre que esta norma vai acompañada "subliminalmente" dunha mensaxe de "busca da debilidade" nos alumnos: "O máis importante sempre é buscar o talento".

A conselleira critica tamén "as formas moi dubidosas" de tramitar a 'Lei Celaá', xa que a propia ministra admitiu que na súa redacción recolléronse suxestións de todas as autonomías menos das gobernadas polo PP. "Había información que ás comunidades do PP non nos chegaba ou nos chegaba tarde", censura Pomar.

UNIVERSIDADES PÚBLICAS E PRIVADAS

Durante a entrevista, a titular de Educación da Xunta dixo ter unha relación "cordial" cos reitores das universidades públicas galegas e móstrase "convencida" de poder alcanzar un acordo de financiamento para a partir de 2020. Neste punto, deixa caer que o seu departamento recibiu ofertas para a creación de universidades privadas en Galicia, coa de Abanca como única viable.

"Neste momento non temos ningunha outra oferta viable de universidade privada", explica Pomar, admitindo a continuación que teñen outras opcións, pero de "viabilidade dubidosa". No entanto, recalca que a súa Consellería "ten que asegurar a boa marcha" do sistema público.

Sobre o proxecto que prepara Abanca en Galicia, a conselleira lembra que unha universidade "sempre ten que pasar" polo Parlamento autonómico. Así, avanza que a redacción do anteproxecto de lei, que é "a próxima fase", pódese estender "ata final deste curso". En todo caso, Pomar advirte que un dos criterios da Xunta é "que non se dupliquen titulacións", de modo que se "evite esa competitividade" entre a pública e a privada. "Cada unha mantería o seu lugar, ou debería facelo", apostila.

Outro dos grandes plans do seu departamento é a posta en marcha o próximo curso do Centro de Innovación de FP de Ourense, que se situará na Escola Fogar Mariñamansa e será financiado xunto á deputación presidida polo popular Manuel Baltar.

Cuestionada sobre se atopa maior entendemento coas institucións do mesma cor política, a conselleira suxire que "non debería ser así". "Deberiamos todos ter o mesmo obxectivo, que é promover que os nosos estudos de FP teñan un bo nivel, que xa o teñen, (...) e a verdade é que é unha pena observar que intereses de tipo político poden levar ao traste proxectos tan ambiciosos", lamenta.

A oferta pública de emprego (OPE) para este ano 2019 é tamén un tema estrela do seu departamento, ao sacar un total de 2.064 prazas docentes, 1.788 de libre acceso. "Consciente" da demanda en ensinos como as humanísticas e artísticas, Pomar garante que estas sensibilidades "e outras máis" que trasladen os sindicatos "serán recollidas". "Insisto en que a nosa intención é facer outra boa OPE o próximo curso, pero aventurar cantas prazas ou que especialidades é complicado", sentenza.

EDUCACIÓN CONCERTADA

Acerca da reclamación do Ministerio de Facenda aos pais que desgravaron as achegas aos colexios concertados --o Executivo baséase en que xa non son meras 'doazóns'--, a responsable galega de Educación resolve o tema con que "o que é do Fisco, é do Fisco", polo que a súa Consellería "non ten nada que dicir respecto diso".

Mentres pais afectados argumentan que este pago se debe a que os colexios lles din que os fondos dos concertos son insuficientes, Pomar defende que a Xunta "tenta tamén ir respondendo" as demandas destes centros sostidos con fondos públicos, afirmando ademais que en Galicia "non existe unha loita intestina entre un ensino e outra". No entanto iso, incide en que a súa Consellería "aposta polo ensino público e gratuíto" mentres destina o 11% do seu orzamento á concertada.

Neste sentido, lembra que estes colexios "teñen que respectar" o convenio alcanzado entre sindicatos, Administración pública e patronal que permitiu subir o salario uns 1.260 euros ao ano dos docentes do ensino concertado, xa que se produciron "desaxustes" ao pactar aumentos retributivos similares na pública. "Non é que as reivindicacións sexan da pública, é que tamén son da concertada", puntualiza.

Na entrevista, a conselleira tamén afirma que será durante o curso 2019/20 cando se "normalizará" a medida impulsada por En Marea e aprobada por unanimidade no Parlamento galego pola que os colexios con uniformes deben permitir ás nenas escoller entre levar saia ou pantalón.

Neste sentido, Pomar garante que a Xunta enviará "unha carta a todos os centros" lembrándolles "que teñen que acollerse" á norma. "Creo que nalgúns colexios xa se está facendo con bastante normalidade. O desaxuste este curso está máis na fabricación dos pantalóns, porque os fabricantes non puideron adiantarse ao que ía pasar e creo que o que estaban a facer é pantalóns de mozo unisex", sinala.

A conselleira de Educación, Universidade e Formación Profesional, Carmen Pomar, | Fonte: Europa Press