Interceptada case media tonelada de cocaína introducida por Galicia con destino ao mercado británico
As investigacións continúan abertas co obxectivo de proceder á detención das persoas relacionadas cos feitos.
Por E.P. | SANTIAGO DE COMPOSTELA | 27/02/2019 | Actualizada ás 16:08
Axentes da Policía Nacional abortaron a distribución de 400 quilogramos de cocaína que se atopaban escondidos nunha nave industrial do Corredor do Henares, en Madrid, tras ser introducidos por Galicia, á espera do seu traslado ao Reino Unido.
Segundo informou a Policía Nacional, as investigacións policiais confirmaron que unha organización hispano-británica conseguira introducir en España unha "importante cantidade de cocaína" a través das costas de Galicia.
"En camión transportárona ata Madrid e ocultárona ata que chegase o mellor momento para sacala do territorio nacional", relataron as mesmas fontes policiais. Durante a análise dos bloques de cocaína, a Policía Nacional comprobou que gran parte deles están marcados co logotipo 'M', mentres que o resto levan un logo manuscrito.
"Posiblemente, estes paquetes fosen alterados pola propia organización, xa que é moi pouco frecuente que se interveña este tipo de contido co anagrama debuxado e non baixo relevo", puntualizou a Policía. As investigacións continúan abertas co obxectivo de proceder á detención das persoas relacionadas cos feitos.
