O PP defende a política de igualdade da Xunta coa baixada do paro feminino

O portavoz parlamentario do PPdeG, Pedro Puy, asegurou que as medidas en materia de igualdade postas en marcha pola Xunta no últimos dez anos "están a dar resultados" e celebrou que este mes de febreiro Galicia rexistrase a "menor cifra de paro feminino" de toda a serie histórica.

Puy referiuse aos datos publicados este luns polo Ministerio de Traballo: o número de parados rexistrados nas oficinas dos servizos públicos de emprego baixou en 1.091 persoas en Galicia en febreiro en relación con xaneiro (-0,62%), fronte ao incremento en 3.279 desempregados no conxunto estatal (+0,1%).

Respecto diso, tras asegurar que Galicia ten unhas cifras positivas que "destacan en comparación co conxunto de España", considerou que é "especialmente relevante" a mellora do mercado laboral feminino, cun total de "482.000 mulleres afiliadas", o que supón o 48% do total.

Nesta liña, puxo en valor que en Galicia haxa "12.000 mulleres" con postos directivos, que as empresarias con asalariados ao seu cargo aumenten nun "7,9%", así como que a evolución dos salarios das mulleres desde 2008 a 2016 sitúe a Galicia como "a segunda na que máis crecen".

"Isto supón unha redución da fenda salarial desde que empezou a crise de case catro puntos", apuntou Pedro Puy, que defendeu que as accións promovidas pola Xunta nos seus diferentes ámbitos de competencias en materia de igualdade "están a dar resultado".

"ESTABILIDADE DE GALICIA"

Tamén puxo en valor os datos do paro coñecidos este luns o secretario xeral do PPdeG, Miguel Tellado, quen considerou que a "estabilidade" política de Galicia segue protexendo aos galegos do "efecto Sánchez" de destrución do emprego que supuxo a chegada do socialista á Presidencia do Goberno.

E é que, conforme indicou, Galicia é a segunda comunidade que rexistra un maior descenso do desemprego. "Contamos con 14.498 parados menos, o que supón unha baixada do 7,70%, superando ao Estado en case dous puntos e medio e situando Galicia en niveis de paro de hai dez anos".

Por iso, na mesma liña que Pedro Puy e despois de que a semana pasada Feijóo celebrase o décimo aniversario da súa primeira vitoria electoral, Tellado destacou que se observa que o voto ao PP foi "útil" para a creación de emprego e para a mellora de todos os indicadores da economía.

USO PARTIDISTA DA VIOLENCIA DE XÉNERO

Por outra banda, ao ser preguntado polas declaracións nas que a fiscal de violencia de xénero Pilar Fernández, nas que criticou o uso partidista desta problemática, Pedro Puy asegurou compartir a súa opinión.

Ademais, aproveitou para lembrar que se no último pleno non se chegou a un acordo para ler unha declaración institucional sobre o 8 de marzo para "falar dun obxectivo común, da loita pola igualdade e contra a violencia de xénero", foi porque o BNG considerou que o tema debía levar a debate e votación.