Vázquez Taín, Irene Villa e Teresa Viejo, no ciclo 'Educación Século XXI' de Afundación

O xuíz José Antonio Vázquez Taín, a escritora e psicóloga Irene Villa e a xornalista Teresa Viejo serán algúns dos nomes que pasarán polo ciclo 'Educación Século XXI', de Afundación.

Vázquez Taín abrirá o ciclo coa conferencia 'Por que non aprendemos das nosas experiencias?', na que abordará como cada xeración perde parte dos seus membros por cometer erros que eran anunciados. As súas charlas terán lugar en Ferrol o 20 de marzo (19,00 horas) e en Pontevedra o 28 de marzo (19,30 horas).

O seguinte relatorio será da experta en psicoterapia María Jesús Álava, os días 10 e 11 de abril, en Lugo e Santiago, respectivamente. Abordará como se ve afectada a sociedade actual pola falta de tempo e a tensión.

O responsable do equipo de investigación tecnolóxica da unidade de policía xudicial da Garda Civil de Pontevedra, José Torres, falará (o 24 de abril, na Coruña) dos beneficios dos usos das novas tecnoloxías pero tamén dos riscos que supoñen para colectivos vulnerables como menores.

A xornalista e escritora Teresa Viejo participará nunha conferencia sobre comunicación e talento (o 8 de maio, en Ourense), mentres o 9 de maio moderará unha mesa redonda con algúns dos galardoados nos premios Educa Abanca 2018.

Xa en setembro, Marcelo Castelo, dedicado á comunicación persuasiva, estará na Coruña e Vigo. Os días 30 e 31 de outubro Irene Villa contará en Vigo e A Coruña a súa traxectoria profesional no ámbito da educación.

Finalmente, o empresario Álex Rovira falará (11 e 12 de decembro, en Pontevedra e Santiago), sobre a necesidade de crear talento a partir da educación.