Por E.P. | SANTIAGO DE COMPOSTELA | 07/03/2019 | Actualizada ás 14:59
A presidenta da Deputación de Pontevedra, Carmela Silva, urxiulle á Xunta de Galicia a convocatoria dunha comisión mixta de transferencias para que a comunidade autónoma asuma o traspaso dunha serie de competencias que a día de hoxe xestiona o ente provincial. Asegura que a administración que preside está disposta a dotalos de 10 millóns de euros anuais para que se fagan cargo.
En concreto, Carmela Silva apuntou á transferencia os predios de Mouriscade, a estación fitopatolóxica do Areeiro, a escola de Enfermaría, a escola de Cantaría, a cidade infantil Príncipe Felipe e o Museo de Pontevedra. Todos eles son "competencia exclusiva da Xunta de Galicia", apuntou."Estamos dispostos a transferir ese seis equipamentos e estamos dispostos a darlles 10 millóns de euros anuais para que a Xunta asuma esas transferencias con dotación económica", afirmou Carmela Silva.
Carmela Silva lembrou que o vicepresidente da Deputación de Pontevedra, César Mosquera, comunicou o inicio do procedemento para converter o Museo Provincial nun organismo autónomo "para que recupere a autonomía que perdeu co Partido Popular cando era presidente o señor Rafael Louzán". "Ser organismo autónomo facilita moitísimo a transferencia", sinalou.
A presidenta da Deputación fixo referencia á carta -"por non chamarlle pasquín", apuntou- enviada polo conselleiro de Cultura, Román Rodríguez, na que anuncia que a Xunta estaría "disposta a asumir a xestión" do Museo e expón "iniciar a negociación para lograr unha transferencia efectiva do devandito equipamento cultural".
Carmela Silva tamén preguntou a Román Rodríguez, como responsable de Patrimonio Histórico, se está disposto a pór nos orzamentos "os 14 millóns euros que son necesarios para a conservación do Pazo de Lourizán", un inmoble histórico que é propiedade da Deputación, pero que está cedido á Xunta.
Finalmente, a mandataria provincial insistiu en que "mañá mesmo", 8 de marzo, se cree esa comisión mixta de transferencias.Pediu que a reunión teña lugar o vindeiro luns, "porque mañá a presidenta da Deputación fai folga".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.