Por Europa Press / Redacción | SANTIAGO DE COMPOSTELA | 11/03/2019 | Actualizada ás 14:08
O portavoz parlamentario de PPdeG, Pedro Puy, afirmou que tanto el como o seu partido decláranse feministas porque defenden que non debe existir "ningún motivo de discriminación" entre os cidadáns, como establece o artigo 14 da Constitución española.
Así mesmo, sostén que esta postura non é incompatible co respaldo que desde a Xunta de Galicia os populares prestan aos centros educativos que segregan por sexo porque, segundo Puy, trátase dunha cuestión que ten que ver coa "liberdade de elección dos pais" sobre a escolarización dos seus fillos.
"Eu persoalmente entendo que a mellor educación é a integrada. Pero hai cuestións que teñen que ver coa liberdade de elección dos pais sobre a escolarización dos seus fillos", incidiu o portavoz do PPdeG este luns nunha rolda de prensa na que apuntou que os centros educativos que segregan por sexo "son moi minoritarios en Galicia".
Así, días despois de que, ás portas do 8 de marzo, o presidente galego, Alberto Núñez Feijóo, evitase concretar se se declaraba feminista, Pedro Puy indicou que el si "como a inmensa maioría de cidadáns" defende os postulados do feminismo.
"Estou nun partido que leva anos loitando e dando pasos adiante, non só no ámbito normativo, senón tamén nas reivindicacións sociais que permiten que esa igualdade (entre sexos) sexa efectiva", dixo o portavoz dos populares no Pazo do Hórreo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.