Polémica pola manipulación de viñetas de Davila polo PP para atacar o Goberno de Sada

"Os populares de Sada utilizan debuxos meus sen pedirme permiso para facer propaganda política. Alucino coa caradura dalgúns!. Si se aproveitan deste xeito dun debuxante, que farán logo a hora de xestionar cartos públicos...". Esta era a denuncia que facía o viñetista Luís Davila en Twitter, tras coñecer que algunhas das célebres personaxes creadas por el estaban sendo reutilizadas polo Partido Popular en Sada para atacar o Goberno local, en mans de Sadamaioría. 

Con algún programa de edición de imaxes por ordenador, no PP apropiáronse desas personaxes sen pedir permiso ao autor, e colocáronnas en carteis propagandísticos onde se critican as políticas do Goberno de Sada. Ese uso partidista do seu traballo, e sen pedir permiso, amolou ao artista.

Davila optou por facer unha denuncia pública desde a súa conta en Twitter, mais desbotou iniciar calqueroutra acción: "Non vou denunciar, pero o certo é que o cabreo é importante. Quero pensar que o fixeron dende a inconsciencia e ignorando o funcionamento das cousas. Xa non é a primeira nin a segunda vez que me pasa. O que si pido é que rectifiquen retirando as viñetas manipuladas".

Dito e feito, Ante o balbordo xerado, no PP de Sada recuaron, retiraron as montaxes creadas e pediron desculpas a Davila. Foi mediante unha comunicación persoal, pero tamén pública, cun comunicado asinado polo portavoz e candidato popular Ernesto Anido, no que asegura que "non era coñecedor da situación", que recoñece como "desagradable e inxusta".

Anido bota a culpa a "un membro do noso equipo", di, ao que se delegou o "uso propagandístico" desas imaxes, "coa confianza de que se estaría facendo dun xeito correcto, e coa súa preceptiva autorización", argúe.

Tras confensar que non se pedira permiso para o uso desas imaxes, Anido, que se confesa "fan" de Davila, prosegue: "Comprométome a non volver a usar o seu traballo. Non me queda máis que disculparme con vostede con sinceridade e humildade. Respecto o seu traballo, e non é xusto o que fixemos".

Dito isto, Anido tamén quixo contesta a crítica de Davila ao PP sobre a xestión de cartos públicos. Así, espetoulle: "Tamén saiba que nos catro anos que estiven como alcalde en Sada, xestionamos os cartos do Concello dun xeito transparente, legal e limpo".

E remata a misiva cun convite a Davila a xantar co candidato popular en Sada.