A primavera chegará a Galicia ás 22,58 horas do próximo mércores
A nova estación iniciarase co paso aparente do Sol polo punto Aries, un dos dous puntos de corte da eclíptica co ecuador celeste.
Por Europa Press / Redacción | SANTIAGO DE COMPOSTELA | 15/03/2019 | Actualizada ás 15:58
Galicia, do mesmo xeito que o resto do hemisferio norte, recibirá á primavera ás 22,58 horas do próximo mércores, 20 de marzo, despedindo así a un inverno que, na comarca de Compostela, foi un dos máis secos dos últimos 50 anos.
Así o precisou o director do Observatorio Astronómico Ramón María Aller da USC, José Ángel Docobo, que lembrou que a nova estación iniciarase co paso aparente do Sol polo punto Aries, un dos dous puntos de corte da eclíptica co ecuador celeste.
Durante este novo período produciranse dúas choivas de estrelas, as Líridas, en torno ao 22 de abril, e as Eta-Acuáridas, ao comezo de maio. Destacan, ademais, algunhas aliñacións de astros, como a da Lúa cos planetas Mercurio, Venus, Júpiter e Saturno nos amenceres do 30 e 31 de marzo. Con todo, apuntan desde a USC, haberá que esperar á chegada do verán para poder contemplar unha eclipse parcial de Lúa.
UN INVERNO SECO
En canto á estación que termina, José Ángel Docobo explicou que o inverno foi o décimo máis seco dos últimos 50 anos en Santiago de Compostela. En concreto, e cunha media de 600 litros por metro cadrado de choiva no último medio século, os 347,7 litros por metro cadrado que caeron neste inverno fano dos máis secos, aínda que aínda lonxe do de 2011-2012, cando en Santiago choveu só 100,8 litros por metro cadrado.
Con todo, o director do Observatorio chamou a atención sobre o feito de que, nos últimos 50 anos, rexistráronse en Santiago catro invernos nos que se recolleron máis de 1.000 litros por metro cadrado de choiva, tres deles dentro do século XXI, "o que, en certo xeito, desmitifica a crenza popular de que antes chovía máis que agora".
Concretamente, estes rexistros producíronse nos invernos de 2000-2001 (1.445,7 litros por metro cadrado), 2013-2014 (1.202,7 litros) e 2009-2010 (1.091,7 litros). Estes días, explicou Docobo, Galicia está na época do ano na que o Sol está practicamente o mesmo tempo por encima que por baixo do horizonte". A nova estación prolongarase ata as 17,54 horas do 21 de xuño, cando comezará o verán.
