Xiro inesperado no conflito das ambulancias
Finaliza sen acordo a reunión entre patronal e sindicatos para aprobar definitivamente o convenio das ambulancias.
Por Europa Press / Redacción | SANTIAGO DE COMPOSTELA | 25/03/2019 | Actualizada ás 22:02
A reunión entre a patronal galega das ambulancias e os sindicatos concluíu sen que as partes alcanzasen un acordo definitivo para aprobar o convenio que rexerá o sector do transporte sanitario de Galicia ata o ano 2022.
O encontro celebrouse ao longo da tarde do luns e finalizou ao redor das 20,30 horas. As partes emprazáronse a realizar unha nova reunión o próximo 1 de abril ás 16,00 horas para ultimar os detalles do convenio tras o preacordo alcanzado o pasado luns polo que se desconvocou a folga no sector.
Fontes sindicais consultadas por Europa Press apuntaron que o principal motivo de desencontro é a fixación do salario para os contratos en prácticas e a porcentaxe de contratos indefinidos a asumir polas empresas.
Por parte da Federación Galega de Empresarios das Ambulancias sinalan que a reunión levou a cabo baixo un ambiente cordial e que as negociacións, desbloqueadas despois do preacordo asinado na madrugada do 19 de marzo, avanzan en boa dirección.
O preacordo do convenio, que, entre outras cuestións, recolle unha táboa de subidas salariais de entre o 18 e o 20 por cento ata o ano 2022, foi ratificado a pasada semana polos traballadores do transporte sanitario de Galicia, que desconvocaron a folga indefinida prevista a partir do 20 de marzo.
