A Xunta defende a "legalidade" dos informes ambientais da mina de Touro ao pedir En Marea o seu "carpetazo"

O deputado de En Marea Antón Sánchez acusou á Xunta de ser "cómplice" da contaminación da mina de Touro-O Pino (A Coruña) ao non emitir unha avaliación de impacto ambiental negativa ao proxecto mineiro que se pretende implantar na zona, á vez que lle pediu que dea "carpetazo" ao proxecto que promove na zona Cobre San Rafael. 

Ante estas acusacións esgrimidas no pleno do Parlamento de Galicia, a conselleira de Infraestruturas e Mobilidade, Ethel Vázquez, replicou que as leis "están para cumprirse" e que os técnicos encargados fan informes "con legalidade".

Así respondeu despois de que o deputado de En Marea acusase ao PP de "levar tolerando 30 anos a contaminación na contorna", apuntando ademais que, como consecuencia das choivas de xaneiro, se produciu un desbordamento de materiais da balsa de Bama que chegaron a un afluente do río Ulla. "É unha ameaza para a vida das persoas, para a saúde e para o medio ambiente. Vostedes foron cómplices absolutos da actividade delituosa desta empresa", apuntou Sánchez.

Deste xeito, Ethel Vázquez quixo deixar claro as "diferenzas" entre a antiga mina de Touro e o que será a actividade futura de Cobre San Rafael na zona. Respecto desta última, a conselleira asegurou que "velarán polo cumprimento da lei, pola calidade das augas e por minimizar as afeccións á contorna". Tamén aproveitou para arremeter contra o goberno local de Santiago, ao que "lle importa ben pouco" a calidade das augas do río Sar, xa que o proxecto da depuradora está atrasado "sine die".

ACCIDENTES VIARIOS POR XABARÍS

Por outra banda, a conselleira de Infraestruturas tamén respondeu a unha pregunta do socialista José Manuel Pérez Seco, quen alertou de que a incidencia dos xabarís nas estradas galegas son "unha das principais causas de sinistralidade", "especialmente de noite" porque a actividade destes animais "é principalmente nocturna". "En 2018 producíronse en Galicia máis de 4.800 accidentes de fauna salvaxe, máis da metade por xabarís", apuntou, para despois evidenciar o "fracaso" das políticas da Xunta neste contexto.

Ethel Vázquez defendeuse dicindo que a seguridade viaria "non é tema exclusivo de Galicia" nin da súa rede de estradas, senón que tamén o xabaril incide na rede estatal, onde -insistiu- os accidentes provocados por esta especie son "o dobre" que en vías autonómicas. Ademais, criticou que a Delegación do Goberno continúe "sen responder" a última proposta de protocolo de seguridade que lle trasladou a súa Consellería. "Cero implicación", afeou Vázquez.

QUECEMENTO GLOBAL

Tamén durante o pleno no Pazo do Hórreo, a conselleira de Medio Ambiente, Ángles Vázquez, reafirmou a "preocupación" da Administración autonómica polo cambio climático. Tendeu "a man" aos miles de estudantes que cada venres se manifestan acudindo á folga contra esta problemática global, aínda que apostou por "que vaian a clase e despois se manifesten". "A Administración non vai soa, vai con eles", engadiu.

En concreto, respondeu a unha pregunta formulada polo deputado de En Marea Marcos Cal, quen apuntou que "desde a Revolución Industrial a temperatura da terra creceu un grao e medio" e asegurou que Galicia produce "tres puntos máis" de gases por habitante que a media doutras rexións.

Ademais, acusou á Xunta de "non querer facer" unha transición enerxética" porque no canto de "reconverter" o emprego das industrias térmicas, "ao final ocorre que os traballadores queden sen traballo". "Vostedes son os do imposto ao sol, do boicot ás renovables", engadiu.