Por Europa Press / Redacción | SANTIAGO DE COMPOSTELA | 03/04/2019 | Actualizada ás 12:25
O comité de folga acudirá este venres a unha reunión con representantes do Sergas para abordar os seus "cinco puntos irrenunciables", entre os que inclúen a apertura dunha mesa de diálogo para tratar as demandas dos profesionais sanitarios recollidas na convocatoria de paros para o 9, 10 e 11 de abril en Atención Primaria en Galicia.
Xosé María Dios, un dos portavoces da Coordinadora Galega de Atención Primaria --que promove os paros convocados formalmente por seis sindicatos-- e membro do comité de folga, aclarou que a reunión á que foron convocados este venres polo Sergas "non é" a mesa de diálogo que piden que se abra para abordar os seus "cinco puntos irrenunciables".
Neste sentido, explicou que se trata dunha reunión á que foi citado o comité de folga ás 9,30 horas deste venres para analizar as reivindicacións que se inclúen na convocatoria de folga, entre as que figura a apertura dunha mesa de diálogo para tratar o "cinco puntos irrenunciables". "Non deben de ser moi inconcretas as nosas reivindicacións como di o señor Campa (xerente do Sergas)", destacou este portavoz en relación á convocatoria deste venres.
Neste sentido, preguntado sobre se a reunión deste venres é a mesa de diálogo pedida polos convocantes da folga para poder freala, asegurou que "non pode ser". "Unha vez aberta a mesa de diálogo teremos que nomear á xente que ten que ir", dixo para referirse a representantes de sociedades científicas, colexios médicos, sindicatos, outras entidades sanitarias e Administración.
Deste xeito, o comité de folga lembrou que solicitan na convocatoria unha mesa de diálogo que o Sergas "ten que negociar previamente co comité". "Se a abren antes da folga sería o ideal", manifestou este portavoz da Coordinadora, que avanzou que nese caso reuniríase o comité e estudaría "modificar" a convocatoria de paros de abril. "Queremos seguir para adiante, con boa vontade", aseverou. Por iso, o comité de folga acudirá este xoves ás 12,00 horas á reunión co Sergas para abordar os servizos mínimos da folga e este venres ás 9,30 horas a outra para analizar as reivindicacións.
"FACENDO POLÍTICA"
En relación ás críticas realizadas o luns polo xerente do Sergas, Antonio Fernández-Campa, tras ser anunciada formalmente a convocatoria de folga, Xosé María Dios reprochoulle que critique que a convoquen o último día de prazo e fale de demandas "inconcretas" cando piden que se cre "unha xerencia de Atención Primaria", máis orzamento para este nivel asistencial e que "se convoquen todas as prazas necesarias de médicos e pediatras". "Onde está a inconcreción", preguntouse.
Así mesmo, sobre a acusación de "rumbo político" do xerente do Sergas, este representante da Coordinadora preguntou se non poden "facer política". "Claro que estamos a facer política indirectamente para mellorar a Atención Primaria", concluíu. "Os puntos son cinco e irrenunciables", insistiu este membro do comité de folga, porque "a sanidade merece algo máis que este tres materias ás que responde Campa".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.