Por Galicia Confidencial | Compostela | 05/04/2019 | Actualizada ás 11:03
A Comisión Executiva da Federación de Sanidade de CCOO de Galicia rexeita o acordo asinado entre o Sergas, os colexios de enfermería e a Asociación Galega de Enfermaría Familiar e Comunitaria (AGEFEC) e denuncia que ten coma finalidade rebentar a folga de sanidade.O sindicato coida "inaceptable" que a Administración chegue a acordos fóra da mesa sectorial "sobre materias que han ser negociadas coa representación legal dos traballadores e das traballadoras".
A través dun comunicado, CCOO, di que este último acordo é "un simple conxunto de decisións burocráticas" sobre o funcionamento dos centros, que non aborda "ningún dos verdadeiros problemas" deste persoal. En opinión do sindicato, o pacto "só beneficia os dirixentes do Sergas" no seu "intento desesperado de desmobilizar as traballadoras e os traballadores ante a folga convocada para a semana que vén na atención primaria".
O secretario xeral de CCOO-Sanidade, Ángel Cameselle, suliña que o documento "non di unha soa palabra" sobre o incremento de orzamento que precisa a sanidade pública, tampouco sobre o aumento de cadro de persoal ou a equiparación entre o número de efectivos médicos e de enfermaría nos centros, ou do redimensionamento do número de doentes que cada profesional debe atender na súa xornada de traballo.
"Na nosa opinión, o persoal non apoiará ese acordo, e os colexios profesionais deberán explicar o porqué do asinamento deste documento da vergoña", sentencia Cameselle, quen pide unha "gran participación" na folga dos días 9, 10 e 11 de abril.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.