O 061 atendeu a 89 persoas por 61 accidentes de tráfico o fin de semana en Galicia, das que dúas morreron
Por E.P. | SANTIAGO DE COMPOSTELA | 08/04/2019 | Actualizada ás 11:09
Urxencias Sanitarias de Galicia-061 atendeu a 89 persoas debido a 61 accidentes de tráfico rexistrados o fin de semana na rede viaria galega, das que dúas morreron.
Segundo informou o 061, a Central de Coordinación recibiu 75 chamadas en relación con accidentes de tráfico entre as 15,00 horas do venres 5 de abril e as 23,59 horas do domingo 7. O día que rexistrou máis incidentes foi o sábado e o domingo, con 23 sinistros en ambos os casos.
Os recursos sanitarios mobilizados polo 061 ascenderon a 86. Deste xeito, as ambulancias realizaron 79 saídas e os equipos sanitarios prestaron asistencia en sete sinistros. En 16 casos os feridos foron levados aos centros sanitarios correspondentes, en 71 ocasións recibiron atención no lugar do incidente sen necesitar traslado e dúas persoas faleceron no punto do sinistro.
A proporción de homes atendida situouse no 65 por cento e a de mulleres, no 35%. En canto ás idades dos feridos, o 41% dos asistidos tiña entre os 30 e 44 anos. Pontevedra, con 29, foi a provincia con máis accidentes durante os desprazamentos do fin de semana; seguida da Coruña, con 23; Lugo, con cinco; e Ourense, con catro.
