Por Europa Press / Redacción | SANTIAGO DE COMPOSTELA | 22/04/2019 | Actualizada ás 13:45
O portavoz parlamentario do PSdeG, Xoaquín Fernández Leiceaga, expresou que confía en que a xunta de portavoces que se celebrará este martes sirva para fixar a data do pleno "específico" que aborde a petición de renuncia da valedora do Pobo, Milagros Otero, efectuada polos grupos da oposición.
Nunha rolda de prensa celebrada este luns, o socialista tachou de "insustentable" a continuidade de Otero á fronte da institución, xa que "o instrumento" que emprega a valedora para pór o seu cargo a disposición da Cámara "non ten sustento na lei". "Ou hai cesamento ou hai dimisión", apostilou Leiceaga.
A continuación, opinou que a posición asumida por Milagros Otero tras a desestimación do recurso contra a sentenza que anula o nomeamento de María Puy Fraga para o posto de xefe de servizo de Administración e Persoal "está ao servizo da estratexia do Partido Popular".
"O Grupo Popular quere evitar que a negociación cos grupos da oposición se dea coa valedoría vacante", engadiu o portavoz socialista no Hórreo, que remarcou que se trata de "un asunto de alcance político, non persoal".
Así as cousas, Fernández Leiceaga traslada a responsabilidade da situación ao Grupo Popular que, ao seu juico, é "quen ten que tomar a decisión" de se acepta que Otero permaneza no cargo ata que a Cámara acorde o seu substituto como ela pide ou se forza a saída da valedora "e abre, como recolle a lei, o proceso de elección" dos novos responsables do Alto Comisionado do Parlamento de Galicia.
PAULA PRADO
Cuestionada sobre este asunto minutos despois da rolda de prensa do Partido Socialista, a viceportavoz popular na Cámara, Paula Prado, indicou que o seu grupo considera "acertada" a postura adoptada por Milagros Otero "porque non deixa descabezada a institución" durante o tempo que dure o proceso para atopar a súa substitución e o do vicevaledor, Pablo Cameselle (nome impulsado polo PSOE).
Por iso, Prado reclamou aos grupos da oposición que "actúen con responsabilidade" para iniciar o proceso de procura de substituto para Milagros Otero e así "pechar a situación de interinidade na institución".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.