Adriana Lastra pide o voto para un alcalde socialista en Ferrol e así ter "fío directo co Goberno"

A vicesecretaria xeral do PSOE, Adriana Lastra, nunha visita realizada á cidade de Ferrol (A Coruña), instou a votar ao candidato socialista á alcaldía, Anxo Mato, para que "teña fío directo co Goberno". Lastra estivo acompañada do secretario xeral do PSdeG-PSOE, Gonzalo Caballero e de Ángel Mato. O tres dirixentes socialistas coincidiron en destacar que foi un Goberno do PSOE o que asinou o contrato das fragatas F-110 que se construirán nos estaleiros de Navantia na cidade.

Lastra subliñou que a cidade de Ferrol sufriu un cúmulo de problemas e de circunstancias adversas nos últimos anos e "tivo que ser un Goberno socialista no Estado o que maior compromiso adquirise con esta cidade". A socialista remarcou que "ese compromiso ten nomes e apelidos: 5.000 millóns de euros, carga de traballo para dez anos e 7.000 postos de traballo" e engadiu que para continuar nesa senda é preciso "á fronte desta cidade a un alcalde socialista que teña fío directo co Goberno da nación e o grupo parlamentario, un alcalde como Ángel Mato".

Do alcaldable, a dirixente socialista destacou a súa capacidade, o seu rigor e o seu compromiso coa cidade e apostilou que "non se poden imaxinar o insistente e persistente que é". Neste sentido, afirmou que as chamadas do exsenador eran continuas tanto ao delegado do Goberno, como ao grupo parlamentario e ao propio Goberno "para resolver os asuntos de Ferrol". A vicesecretaria xeral do PSOE instou a toda a cidadanía a votar porque segundo expuxo, os socialistas preséntanse nestes comicios ante dous adversarios: a dereita e a abstención. Lastra concluíu que "se a dereita suma, a dereita goberna" e apelou a "evitalo por Ferrol, por Navantia, polos maiores, polas mulleres, polos mozos e a cidadanía no seu conxunto".

MOBILIZACIÓN CONTINUA

Pola súa banda, o secretario Xeral do PSdeG-PSOE, Gonzalo Caballero, asegurou que Lastra é "unha referencia do PSOE" e agradeceu a súa participación na campaña ao longo de todo o día de hoxe en diferentes puntos de Galicia. Caballero valorou que aínda que as enquisas "dan moi ben en toda Galicia" o PSOE non se quere "relaxar" e defendeu que "fronte ao risco da dereita e a ultradereita todos os progresistas teñen que seguir facendo un exercicio de mobilización masiva".

En opinión do dirixente socialista, "Feijóo está moi nervioso desde que perdeu en Galicia as Eleccións Xerais" e afirmou que está "a tentar confundir ao electorado galego nun exercicio que non funciona". Afeou ao presidente do PPdeG que "estea disposto a recibir os votos de calquera das dereitas nos Concellos de Galicia". Caballero pediu "que non se perdan os votos de progreso en casa, nin en forzas políticas que non van ter representación en Concellos onde hai moitísimas candidaturas, como o caso de Ferrol".

Na cidade naval defendeu que só hai dúas opcións, "ou un alcalde da dereita reaccionaria, ao que Feijóo quere colocar aquí para seguir facendo fronte ao Goberno de España e aos progresistas ou un alcalde socialista que lidere unha maioría de progreso, que é Anxo Mato". Mentres tanto, o candidato do PSOE á Alcaldía de Ferrol, Ángel ato, tamén presumiu de que "a mellor noticia económica, en relación ao emprego, que se deu nunca nesta comarca en Democracia" tivese selo socialista, en referencia ao programa das F-110.

Precisamente, en materia militar e de Defensa, Mato denunciou que "o PP quere utilizar Ferrol como ferramenta contra o Goberno central" e afeou que o candidato popular, José Manuel Rey Varela, fale "da política europea de Defensa en relación" coa participación ou non en operacións internacionais", en referencia á retirada da fragata Méndez Núñez de augas do Oriente Próximo.

FERROL (Adriana Lastra e Caballero) | Fonte: Europa Press