Denunciado o 'narco' Manuel Charlín por agredir a unha muller cun alicate e insultar a policías locais

O capo xa protagonizara un enfrontamento con varios veciños e axentes da Policía Local de Vilanova. Unha veciña de Vilanova de Arousa denuncia o 'narco' Manuel Charlín por agredila cun alicate

Por Europa Press / Redacción | SANTIAGO DE COMPOSTELA | 04/06/2019 | Actualizada ás 19:16

Comparte esta noticia

Unha veciña de Vilanova de Arousa presentou unha denuncia nas oficinas da Policía Local da localidade por unha presunta agresión por parte de Manuel Charlín, o coñecido narcotraficante da zona.

Segundo o relato da denunciante, a última hora da tarde do luns Manuel Charlín, de 87 anos de idade, enfrontouse verbalmente a un grupo de veciños que residen no mesmo bloque de vivendas no que o patriarca do 'clan dos Charlines' ten un piso da súa propiedade.

Manuel Charlín
Manuel Charlín | Fonte: EP

Non é a primeira vez que Manuel Charlín se enfronta aos inquilinos deste edificio, pero nesta ocasión a disputa creceu en intensidade ata o punto en que os veciños solicitaron a presenza da Policía Local, que se presentou no edificio. Instantes despois tamén se desprazou ata o lugar unha dotación da Garda Civil.

Nun momento dado, segundo consta na denuncia, Manuel Charlín agrediu cun alicate unha das veciñas provocándolle diversas feridas e contusións. A muller foi trasladada ao Hospital do Salnés onde foi atendida de feridas de prognóstico leve e posteriormente dada de alta.

A Policía Local de Vilanova trasladou a denuncia presentada pola veciña presuntamente agredida aos Xulgados de Cambados para a súa tramitación.

DENUNCIADO TAMÉN POLA POLICIA

Tan só un día antes, Manuel Charlín protagonizara un enfrontamento con varios axentes da Policía Local de Vilanova. O patriarca dos Charlines aparcou o seu coche xusto na saída da ponte peonil que une o centro urbano de Vilanova coa península do Terrón, obstaculizando o paso ás moitas persoas que por alí transitan, especialmente durante a fin de semana, xa que o tramo forma parte da Variante Espiritual do Camiño de Santiago.

Tras comprobar que o vehículo estaba mal estacionado, os axentes localizaron a Charlín nun bar próximo e comináronlle a que retirase o coche, ao que o patriarca fixo caso omiso.

Ante esa situación, a Policía Local solicitou a presenza dun guindastre ao obxecto de proceder á retirada do vehículo. Foi ao ver chegar o guindastre cando Manuel Charlín abandonou o bar e dirixiuse cara aos axentes proferindo todo tipo de insultos.

Ante a firmeza da Policía Local, que non lle permitiu que levase o vehículo, Charlín abonou finalmente o importe correspondente ao enganche do guindastre, recolleu a denuncia pola infracción de tráfico e esperou a que chegase unha persoa que levou o coche do lugar.

Ademais das denuncias polo mal estacionamento, os axentes da Policía Local de Vilanova elevaron tamén unha denuncia contra Manuel Charlín Gama por desobediencia á autoridade.

COCHES INDENCIADOS

Non foron estes dous os únicos incidentes nos que se viu envolto o clan dos Charlines nos últimos días. Na madrugada do sábado 2 ao domingo 3 dous coches quedaron totalmente calcinados nunha rúa do centro urbano de Vilanova de Arousa, xusto diante dunha propiedade vinculada aos Charlines.

Dáse a circunstancia de que varios dos inquilinos dese edificio, entre os que se atopa o dono dun dos dous coches incendiados, presentaran con anterioridade denuncias contra os propietarios das súas vivendas por presuntas ameazas e cortes de servizos cos que tentaban provocar o seu desaloxo.

A investigación está a ser levada por axentes da Policía Xudicial de Cambados e especialistas en incendios, ao obxecto de determinar se o sinistro foi accidental ou provocado C.C.G.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta