Consellos para evitar queimaduras e riscos na noite de San Xoán
A Unidade de Queimados do Chuac advirte de que as "consecuencias estéticas e funcionais" de queimaduras "son, ás veces, para toda a vida".
Por Europa Press / Redacción | SANTIAGO DE COMPOSTELA | 20/06/2019 | Actualizada ás 11:25
A Unidade de Queimados do Complexo Hospitalario Universitario A Coruña (Chuac) apela á "prevención e concienciación" para "reducir riscos" na celebración da noite de San Xoán. Ademais, advirte de que as "consecuencias estéticas e funcionais" de queimaduras "son, ás veces, para toda a vida".
Segundo informa a xerencia sanitaria da Coruña nun comunicado, estudos realizados na Unidade de Queimados do Chuac "constatan un aumento significativo de queimaduras nesta noite con respecto do resto de ano".
Respecto diso, destaca que a maioría delas motivadas "polas imprudencias e o consumo irresponsable de bebidas alcohólicas" dos grupos de idade máis novas, engaden as mesmas fontes. Por iso, considera que o modo de reducir estas cifras "é mediante a prevención e a concienciación da poboación". Por iso, aconsellan que "nunca" se prenda a fogueira con líquidos inflamables como gasolina ou alcol.
ROUPA
"As fogueiras débense facer polo menos a 15 metros dos coches ou edificios e nunca baixo unha liña eléctrica", advirten por parte do Chuac e puntualizan que "non se deben prender papeis nin tecidos" porque "o aire pode levantalos e levalos".
Entre outros consellos, inciden en ter coidado cos nenos, así como "non achegarse moito ao lume" porque pode prender na roupa. "Non se debe xogar, empuxar ou correr preto da fogueira", advirten. E á hora de saltar, recoméndase "acudir con roupa axustada e preferentemente de algodón (vaqueiros) e calzado adecuado (pechado, sen tacóns).
Así mesmo, apuntan que non se debe saltar con persoas nas costas ou nenos en brazos e aconsellan "se alguén da contorna non reúne as condicións para facelo, débese tentar persuadir para que non o faga".
QUEIMADURAS
No caso de que se produzan queimaduras por parte do Chuac recomendan botar auga fría para arrefriar a queimadura, cubrir cun pano limpo e acudir ao punto sanitario máis próximo, de Protección Civil, Cruz Vermella ou urxencias.
"Se a queimadura é extensa, arrefriar pouco tempo (polo risco de hipotermia), envolver ao afectado cunha saba limpa e unha manta e acudir cando antes a un centro sanitario", aconsellan. "Non pór cremas, pomadas, desinfectantes nin ungüentos", abundan.
No caso de que prenda lume na roupa, subliñan que "non se debe correr", senón "botarse ao chan e rodar, cubrindo a cara coas mans". Ademais, inciden en que hai que "asegurarse de que a roupa estea apagada antes de quitala e evitar sacala pola cabeza".
Se é outra persoa a que se queima, hai que "apagar o lume cubríndoa cunha peza forte (unha cazadora) e "non botar terra". "Hai que vivir o San Juan, pero hai que ser prudentes", conclúen por parte do Chuac.
