A produción industrial en Galicia baixa un 6,9% en maio, a maior caída do Estado
Por E.P. | SANTIAGO DE COMPOSTELA | 05/07/2019 | Actualizada ás 10:59
O Índice Xeral de Produción Industrial (IPI) rexistrou en maio unha caída do 6,9% en relación ao mesmo período do ano pasado e tamén experimenta un descenso do 7,1% no que vai de 2019. De tal modo, Galicia sofre o maior descenso entre comunidades, seguida de Baleares (-3,8%) e Canarias (-3%), o tres autonomías que rexistran maiores caídas.
Pola contra, dez comunidades rexistraron aumentos da súa produción industrial no quinto mes do ano, especialmente Murcia (+13,8%) e Madrid (+11,1%).
A nivel xeral, a produción industrial subiu un 1,8 por cento o pasado mes de maio en relación ao mesmo mes do ano pasado, taxa 3,8 puntos superior á de abril, segundo informou este venres o Instituto Nacional de Estatística (INE). No conxunto do Estado, co avance interanual de maio, a produción industrial regresa a taxas positivas despois de dous meses consecutivos encadeando descensos.
SECTORES
Dous sectores industriais recortaron a produción en maio: os bens de consumo duradeiro (-4,3%) e os bens intermedios (-1,5%), fronte aos aumentos interanuais rexistrados en bens de consumo non duradeiro (+7,4%), bens de equipo (+1,7%) e enerxía (+1,4%).
Corrixida de efectos estacionales e de calendario, a produción industrial subiu un 1,4 por cento respecto de maio de 2018, taxa catro décimas inferior á de abril.
