Traballan para recuperar a parte do aparello que falta do 'Sen Querer Dous' para usalo na investigación
O buque 'Irmáns García Nodal' realiza operacións ao sur de Fisterra e mergulladores están á espera por se é necesaria a súa participación.
Por Europa Press / Redacción | SANTIAGO DE COMPOSTELA | 09/07/2019 | Actualizada ás 11:23
O buque 'Irmáns García Nodal', de Gardacostas de Galicia, traballa desde as 10,15 horas deste martes na zona na que se afundiu o 'Sen Querer Dous' co obxectivo de retirar a parte do aparello do pesqueiro que aínda non se conseguiu sacar do mar.
Segundo informa Salvamento Marítimo a Europa Press, sácanse estas redes do mar a petición da Comisión Permanente de Investigación de Accidentes e Incidentes Marítimos (Ciaim) para axudar nas pescudas sobre o naufraxio. Ademais, faise esta operación para que o aparello "non sexa un perigo" par a navegación.
Parte do aparello xa foi recuperada o pasado domingo despois de que un veleiro alertase de que saíra á boia cinco millas ao sur de Fisterra. Agora búscase conseguir sacar do mar "o máximo posible". Mergulladores atópanse a espera por se as operacións fan necesaria a súa participación.
Está previsto que este martes o avión de Salvamento Marítimo Sasemar 101 sobrevoe a zona para a observación das operacións, no marco da súa patrulla rutineira polo Cantábrico.
NAUFRAXIO
O 'Sen Querer Dous' afundiuse o 19 de decembro de 2018 nas inmediacións de Fisterra (A Coruña) nun naufraxio con tres falecidos e unha persoa que segue desaparecida.
O pecio atopouse a 114 metros de profundidade 10 días despois do naufraxio. Foi inspeccionado por un robot submarino, pero sen rastro do mariñeiro desaparecido.
Aínda que aínda non hai resultados da investigación oficial, a finais do ano pasado o delegado do Goberno, Javier Losada, apuntou a dous golpes de mar que deixaron sen reacción á tripulación como hipótese do sinistro, o que provocou o envorco da embarcación.
